مرکزی وزیر پیوشگوئل کا لندن، اوسلو، برسلز کا متوقع  دورہ 28 اپریل سے شروع ہوگا

نئی دہلی/ایک عہدیدار نے بتایا کہ وزیر تجارت اور صنعت پیوش گوئل کے لندن، اوسلو، برسلز کے ممکنہ دوروں کا آغاز 28 اپریل سے متوقع ہے۔عہدیدار نے کہا کہ ان شہروں کے پانچ روزہ دورے کا مقصد برطانیہ، ناروے اور یورپی یونین کے ساتھ ہندوستان کے تجارتی اور سرمایہ کاری کے تعلقات کو مزید فروغ دینا ہے۔لندن کا دورہ کلیدی حیثیت رکھتا ہے کیونکہ ہندوستان اور برطانیہ کے درمیان مجوزہ آزاد تجارتی معاہدے کے لیے مذاکرات آخری مراحل کی طرف بڑھ رہے ہیں، دونوں فریقین باقی مسائل کو حل کرنے کے لیے کام کر رہے ہیں۔ذرائع نے عندیہ دیا ہے کہ اب برطانیہ کے ساتھ مذاکرات کے ایک اور مکمل دور کا امکان نہیں ہے کیونکہ بات چیت تیز رفتاری سے آگے بڑھ رہی ہے۔اوسلو کا دورہ اس وقت اہمیت کا حامل ہے جب ہندوستان نے گزشتہ سال مارچ میں چار یورپی ممالک کے بلاک ای ایف ٹی اے کے ساتھ ایک جامع آزاد تجارتی معاہدے پر دستخط کیے تھے۔ توقع ہے کہ اس سال اس پر عمل درآمد ہو جائے گا۔یورپی فری ٹریڈ ایسوسی ایشن (ای ایف ٹی اے( کے ارکان آئس لینڈ، لیچٹنسٹائن، ناروے اور سوئٹزرلینڈ ہیں۔ دونوں فریقوں نے 10 مارچ 2024 کو تجارتی اور اقتصادی شراکت داری کے معاہدے (TEPA) پر دستخط کیے۔معاہدے کے تحت، ہندوستان نے گروپنگ سے 15 سالوں میں  100 بلین  ڈالرکی سرمایہ کاری کا عہد حاصل کیا ہے جبکہ متعدد مصنوعات جیسے سوئس گھڑیاں، چاکلیٹ، اور کٹ اور پالش شدہ ہیروں کو کم یا صفر ڈیوٹی پر اجازت دی ہے۔