آئندہ کچھ دنوں تک خشک موسمی صورتحال کی پیشگوئی

24 اور 25 اکتوبر کو پھر موسم میں تبدیلی کا امکان
 کسان موسمی پیشگوئی کو مدنظر رکھتے اپنی زرعی سرگرمیوں کی منصوبہ بندی کریں / محکمہ موسمیات
سرینگر /17اکتوبر / / محکمہ موسمیات نے آئندہ چند روز تک خشک موسمی صورتحال کی پیشگوئی کرتے ہوئے بیچ بیچ میں ہلکی بارشوں کا امکان ظاہر کیا ہے ۔ نیشنل نیوز بیورو ( این این بی ) کے مطابق جموں و کشمیر میں آئندہ چند روز کے دوران موسم مجموعی طور پر خشک رہنے کا امکان ہے، تاہم آج یعنی 17 اکتوبر کو بعض ایک الگ تھلگ مقامات پر ہلکی بارش کا مختصر دور ہو سکتا ہے۔ محکمہ موسمیات کے مطابق 24 اور 25 اکتوبر کو موسم میں تبدیلی متوقع ہے اور اس دوران کئی مقامات پر ہلکی بارش جبکہ بالائی علاقوں میں ہلکی برفباری کا امکان ہے۔محکمہ موسمیات کے سرینگر مرکز کی جانب سے جاری پیشگوئی کے مطابق 17 اکتوبر کو جموں و کشمیر میں موسم عمومی طور پر خشک رہنے کی توقع ہے، تاہم بعض مقامات پر مختصر وقت کے لئے ہلکی بارش ہو سکتی ہے۔انہوں نے کہا کہ 18 اکتوبر سے 23 اکتوبر کی سہ پہر تک بیشتر علاقوں میں موسم خشک رہنے کا امکان ظاہر کیا گیا ہے۔ اس دوران کسی بڑے موسمی نظام کی توقع نہیں ہے اور مجموعی طور پر موسمی حالات معمول کے مطابق رہنے کی پیش گوئی کی گئی ہے۔محکمہ موسمیات کے مطابق 24 اور 25 اکتوبر کو آسمان عام طور پر ابرآلود رہ سکتا ہے۔ اس دوران کئی مقامات پر ہلکی بارش جبکہ بالائی علاقوں میں ہلکی برفباری کا امکان ہے۔ بعض مقامات پر گرج چمک کے ساتھ تیز ہوائیں چلنے کی بھی توقع ہے۔26 سے 28 اکتوبر کے دوران ایک بار پھر موسم مجموعی طور پر خشک رہنے کا امکان ہے۔دریں اثنا، محکمہ موسمیات کے سرینگر مرکز نے کسانوں کو مشورہ دیا ہے کہ آئندہ دنوں میں زیادہ تر خشک موسم کی پیش گوئی کے پیش نظر وہ فصلوں کی کٹائی اور دیگر زرعی سرگرمیاں دوبارہ شروع کر سکتے ہیں۔ کسانوں سے کہا گیا ہے کہ وہ موسمی پیش گوئی کو مدنظر رکھتے ہوئے اپنی زرعی سرگرمیوں کی منصوبہ بندی کریں۔