دھوپ نکلنے سے دن کو قدرے راحت ،آسمان صاف رہنے سے رات کو پھرسردی کی شدت

دوران شب درجہ حرارت میں یکایک کئی کئی ڈگری گراﺅٹ
 سری نگرمیں پارہ منفی4.4:پہلگام ،شوپیان ، سونہ مرگ اورکولگام واننت ناگ سردترین مقامات
14جنوری تک موسم عمومی طور پرخشک،فضاءمیں گرم ہواﺅں کااثر برقرار:موسمیاتی مرکز سری نگر
سری نگر/ 14جنوری تک موسم عمومی طور پرخشک رہنے کی پیش گوئی اوردن کے وقت دھوپ نکلنے کے بیچ کشمیر وادی کو پھرایک مرتبہ شدید سردی کی لہرنے اپنی لپیٹ میں لیاہے ،کیونکہ بدھ اورجمعرات کی درمیانی رات سری نگرمیں کم سے کم درجہ حرارت منفی4.4ڈگری سینٹی گریڈ ریکارڈکیاگیا جبکہ پہلگام منفی10.4،شوپیان منفی9.9،گلمرگ 9.6، سونہ مرگ منفی9.4اورکولگام واننت ناگ منفی 8.4ڈگری سینٹی گریڈ شبانہ درجہ حرارت کیساتھ سردترین مقامات رہے ۔اس دوران موسمیاتی مرکزسری نگر نے پھرکہاکہ 14جنوری تک موسم عمومی طور پرخشک رہنے کی وجہ سے وادی کشمیر اور جموں خطے میں فضاءمیں گرم ہواﺅں کااثر برقراررہے گا۔جے کے این ایس کے مطابق کشمیر وادی میں مسلسل چوتھے روزیعنی جمعرات کو بھی دن کے وقت دھوپ نکل آئی اور فضاءمیں گرم ہوائیں چلنے کی وجہ سے سردی کی شدت میں کمی محسوس کی گئی ۔اس دوران بدھ اورجمعرات کی درمیانی رات سری نگرسمیت کشمیرکے سبھی میدانی اورنچلے علاقوںمیں رات کا درجہ حرارت میں تیزی سے گراﺅٹ درج کی گئی،جسکے نتیجے میں اہلیان کشمیر کیلئے گزشتہ رات کافی تکلیف دہ رہی۔جمعرات کی صبح بھی سردترین ہوائیں چلتی رہیں اور کئی علاقوںمیں گہری دُھند بھی چھائی رہی،تاہم صبح 10بجے کے بعد سورج نکلنے کیساتھ ہی سردہوائیں کافی حدتک کافور ہوگئیں اور گرم ہوائیں چلنے سے لوگوںنے شدیدسردی سے کچھ راحت محسوس کی ۔موسمیاتی مرکزسری نگر نے بدھ اور جمعرات کی درمیانی رات کشمیر بھر کے میدانی اور بالائی علاقوںمیں ریکارڈ کئے گئے کم سے کم درجہ حرارت کی تفصیلات جاری کرتے ہوئے کہاکہ دوران شب سری نگرمیں کم سے کم پارہ منفی 4.4،قاضی گنڈ میں منفی6.2،پہلگام میں منفی10.4،کپواڑہ میں منفی4.6،کوکرناگ میں منفی5.6،گلمرگ میں منفی9.6،سونمرگ میں منفی9.4،بانڈی پور ہ میں منفی3.8،بارہمولہ میں منفی2.2،پلوامہ میں منفی6.4،اننت ناگ میں منفی8.4،کولگام میں منفی8.4،شوپیاں میں منفی9.9اورلارنومیں منفی11.6 ڈگری سینٹی گریڈ ریکارڈکیاگیا۔اس دوران موسمیاتی مرکز سری نگر نے سوشل میڈیا پرایک خاکہ جاری کرتے ہوئے 14جنوری تک موسم عمومی طور پرخشک رہنے کی پیش گوئی کرتے ہوئے کہاہے کہ اس دوران کشمیر اور جموں خطے میں فضاءمیں گرم ہواﺅں کااثر برقراررہے گا۔ موسمیاتی مرکز سری نگر نے ایک بیان میں کہاکہ 9اور10جنوری تک مطلع ابرآلود رہے گا جبکہ 11جنوری کو آسمان پر بادل چھائے رہنے کے بیچ جموں کے میدانی علاقوں میں ہلکی بارش اور کشمیر ڈویڑن کے الگ تھلگ اونچے علاقوں میں برف ہونے کاامکان ہے۔تاہم اسکے بعد12سے14جنوری تک موسم عام طور پر خشک رہنے کے بعد15اور16جنوری کو آسمان پر بادل چھائے رہنے کے بیچ الگ تھلگ جگہوں پر بکھرے ہوئے مقامات پرہلکی برف باری ہوسکتی ہے۔اس دوران الگ تھلگ جگہوں پر سردی کی لہرجاری رہے گی جبکہ باقی مقامات پر سردی کی شدت میں کمی آئے گی۔سیاحوں،مسافروں اورٹرانسپورٹرز کو مشورہ دیا جاتا ہے کہ وہ انتظامیہ اورٹریفک محکمہ کی ایڈوائزری پر عمل کریں۔