ایک درخت لگا کرہم اپنی ماں کی موجودگی کو ہمیشہ کےلئے زندہ رکھ سکتے ہیں: مودی
نئی دہلی، 24 نومبر (یو این آئی) وزیر اعظم نریندر مودی نے ‘ایک پیڑ ماں کے نام’ مہم میں پانچ ماہ کے اندر 100 کروڑ سے زیادہ درخت لگانے اور کئی دوسرے ریکارڈ بنانے پر خوشی کا اظہار کرتے ہوئے کہا کہ ‘ایک درخت لگا کرہم اپنی ماں کی موجودگی کو ہمیشہ کے لئے زندہ رکھ سکتے ہیں۔”مسٹرمودی نے آل انڈیا ریڈیو پر اپنے ماہانہ پروگرام ‘من کی بات’ میں کہا، ”میں آپ کے ساتھ ملک کی ایک ایسی حصولیابی شیئر کرنا چاہتا ہوں جسے سن کر آپ خوشی اور فخر محسوس کریں گے اور اگر آپ نے نہیں کیا ہے تو شاید افسوس بھی ہو گا۔ کچھ مہینے پہلے ہم نے ‘ایک پیڑ ماں کے نام’ مہم شروع کی تھی۔ اس مہم میں ملک بھر سے لوگوں نے بڑے جوش و خروش سے حصہ لیا۔ مجھے یہ کہتے ہوئے بہت خوشی ہو رہی ہے کہ اس مہم نے 100 کروڑ درخت لگانے کا اہم سنگ میل عبور کر لیا ہے ۔ 100 کروڑ درخت، وہ بھی صرف پانچ مہینوں میں – یہ ہمارے ہم وطنوں کی انتھک کوششوں سے ہی ممکن ہوا ہے ۔”وزیر اعظم نے کہا، "آپ کو اس سے متعلق ایک اور بات جان کر فخر ہو گا۔ ‘ایک پیڑ ماں کے نام’ مہم اب دنیا کے دیگر ممالک میں بھی پھیل رہی ہے ۔ جب میں گیانا میں تھا تو میں نے وہاں بھی اس مہم کا مشاہدہ کیا۔ وہاں میرے ساتھ گیانا کے صدر ڈاکٹر عرفان علی، ان کی اہلیہ کی والدہ اور خاندان کے باقی ممبران، ‘ایک پیڑ ماں کے نام’ مہم میں شامل ہوئے ۔انہوں نے کہا کہ یہ مہم ملک کے مختلف حصوں میں مسلسل جاری ہے ۔ ‘ایک پیڑ ما کے نام’ مہم کے تحت مدھیہ پردیش کے اندور میں درخت لگانے کا ایک ریکارڈ قائم کیا گیا ہے – یہاں 24 گھنٹے میں 12 لاکھ سے زیادہ درخت لگائے گئے ۔ اس مہم کی وجہ سے اندور کی ریوتی ہلز کے بنجر علاقے اب سرسبز و شاداب علاقوں میں تبدیل ہو جائیں گے ۔ راجستھان کے جیسلمیر میں اس مہم کے ذریعے ایک انوکھا ریکارڈ بنایا گیا- یہاں خواتین کی ٹیم نے ایک گھنٹے میں 25 ہزار درخت لگائے ۔ ما¶ں نے اپنی ماں کے نام پر درخت لگائے اور دوسروں کو بھی متاثر کیا۔ یہاں پر پانچ ہزار سے زائد لوگوں نے مل کر ایک جگہ درخت لگائے – یہ بھی اپنے آپ میں ایک ریکارڈ ہے ۔انہوں نے کہا کہ ایک پیڑ ماں کے نام مہم کے تحت کئی سماجی تنظیمیں مقامی ضروریات کے مطابق درخت لگا رہی ہیں۔ ان کی کوشش یہ ہے کہ جہاں کہیں بھی درخت لگائے جائیں، وہاں ماحولیات کے مطابق ایک مکمل ماحولیاتی نظام تیار ہو۔ اس لئے یہ تنظیمیں کچھ جگہوں پر دوا¶ں کے پودے لگا رہی ہیں تو کہیں چڑیوں کا بسیرا بنانے کے لئے پیڑ لگارہی ہیں۔ بہار میں ‘جیویکا سیلف ہیلپ گروپ’ کی خواتین 75 لاکھ درخت لگانے کی مہم چلا رہی ہیں۔ ان خواتین کی توجہ پھل دار درختوں پر ہے ، تاکہ وہ مستقبل میں آمدنی حاصل کر سکیں۔
