پٹنہ (یو این آئی) بہار کی راجدھانی پٹنہ میں سال 2013 میں بھارتیہ جنتا پارٹی (بی جے پی) کی طرف سے وزارت عظمیٰ کے امیدوار مسٹر نریندر مودی کی ہنکار ریلی کے دوران تاریخی گاندھی میدان اور پٹنہ جنکشن پر ہونے والے سلسلہ وار بم دھماکوں کے معاملے قومی تحقیقاتی ایجنسی (این آئی اے ) کی خصوصی عدالت نے آج چار قصورواروں کو پھانسی کی سزا، دو کو عمر قید اور دو کو دس سال کی قید بامشقت اور ایک ملزم کو سات سال کی قید بامشقت کی سزا سنادی۔اس معاملے میں قصوروار قراردیئے گئے 9 ملزمین کو آج صبح سخت سکیورٹی کے درمیان پٹنہ کی بیور جیل سے خصوصی جج گرویندر سنگھ ملہوترا کی عدالت میں لایا گیا۔ عدالتی کارروائی شروع ہوتے ہی جج نے سزا کے نکات پر فریقین کے دلائل سنے ۔این آئی اے کے اسپیشل پبلک پراسکیوٹر للن پرساد سنہا نے مجرموں کو سخت سے سخت سزا دینے کا مطالبہ کیا، جبکہ دفاعی وکیل سید عمران غنی نے کیس کے احوال اور ملزمین کی معاشی اور سماجی حالت کا حوالہ دیتے ہوئے نرمی برتنے اور کم سزا دینے کی درخواست کی۔ عدالت نے فریقین کے دلائل سننے کے بعد سزا سنانے کے لیے دوسری شفٹ کا وقت مقرر کیا۔ شام 4 بجے عدالت میں دوبارہ کارروائی شروع ہوئی تو مجرموں کو سزا سنائی گئی۔