جموں کشمیر میں ہنر مندوں ، کاریگروں اور دستکاری کےلئے سکیمیں

ترقیاتی منصوبوں میں مقامی نوجوانوں کے روزگار کو بہتر بنانے کی ایل جی کی ہدایت
محکموں کو غیر منظم کارکنوں کو ای شرم پورٹل پر خود کو رجسٹر کرنے میں مدد کرنی چاہئے۔لیفٹیننٹ گورنر
سرینگر//ہنر مندوں ، کاریگروں اور مزدوروں کےلئے سرکار کی جانب سے کئی سکیمیں متعارف کی جاچکی ہیں جن کے ذریعے غریب طبقہ سے تعلق رکھنے والے افراد کی فلاح و بہبود کو یقینی بنایا ہے ۔ خاص طور پر سکل ڈیولپمنٹ کے تحت نوجوانوں کو مختلف ہنروں کی مہارت کےلئے تربیت فراہم کی جاتی ہے ۔ ان تربیتی پروگراموں میں شرکت سے نوجوان روزگار حاصل کرنے کے مواقعے حاصل کرسکتے ہیں ۔ سکل ڈیولپمنٹ نوجوانوں کے مستقبل کےلئے ایک ایساپروگرام ہے جو نہ صرف سماج بلکہ ملک کے نوجوانوں کے مستقبل کو بہتر بنانے کا ایک اہم ذریعہ ہے ۔ملک میں غیر ہنر مند اور ہنر مند مہاجر مزدوروں کی فلاح و بہبود کے لئے حکومت کے ذریعہ نافذ کردہ اسکیمیں ،پروگراموں میں غریب کلیان روزگار ابھیان، پردھان منتری سواندھی اسکیم، آتم نربھر بھارت، پردھان منتری غریب کلیان یوجنا، ایک ملک ایک راشن کارڈ، عمارتوں کی تعمیر اور دیگر تعمیراتی کاموں سے جڑے مزدوروں کا مالی تعاون وغیرہ شامل ہیں ۔ ان سکیموں کے تحت نوجوانوں کو بہتر روزگار کے وسائل کی طرف رہنمائی کی جاتی ہے ۔ اس کے علاوہ محنت و روزگار کی وزارت سے منسلک دفتر، لیبر بیورو، کو مہاجر مزدوروں پر کل ہند جائزے کا اہتمام کرنے کا کام سونپا گیا ہے۔ لیبر بیورو کے ذریعہ کرائے جانے والے اس جائزے کے شیڈیول کو حتمی شکل دینے، نمونہ ڈیزائن تیار کرنے اور دیگر تکنیکی تفصیلات کے لئے حکومت ہند کے ذریعہ ماہرین کا ایک گروپ تشکیل دیا گیاتھا جو غریب مزدوروں ، نوجوانوں کی فراہم کی جانی والی سہولیات پر نظر رکھتے ہیں ۔ اسی تناظر میں گزشتہ روز لیفٹیننٹ گورنر نے متعلقہ محکموں میں بے روزگار نوجوانوں اور مزدوروں کی رجسٹریشن کے عمل کو ہموار کرنے اور ترقیاتی منصوبوں میں مقامی نوجوانوں کے روزگار کو بہتر بنانے کی ہدایت کی۔ انہوں نے یہ بھی کہا کہ محکموں کو غیر منظم کارکنوں کو ای شرم پورٹل پر خود کو رجسٹر کرنے میں مدد کرنی چاہئے۔لیفٹیننٹ گورنر منوج سنہا نے ایک اعلیٰ سطحی میٹنگ کی صدارت کی جس میں ہنر مندی کی ترقی، انٹرپرینیورشپ اور مزدوروں کی بہبود کا جائزہ لیا۔لیفٹیننٹ گورنر نے مختلف امور پر تبادلہ خیال کیا جیسا کہ ہنر مندی کی ترقی کی اسکیموں کا ہم آہنگی پیدا کرناکاروباری صلاحیتوں کے ذریعے تمام شعبوں میں روزگار پیدا کرنے کے مواقع اور حکمت عملی، ہنر کے فرق کے تجزیہ اور ہنر مندی کے لیے اسکل میپنگ، لیبر فورس اور نوجوانوں کی ری اسکلنگ، اور صحت کی دیکھ بھال کے موثرنفاذ،مزدوروں کی فلاح و بہبود کے لیے سماجی تحفظ کی اسکیمیں اور نوجوانوں اور خواتین کے لیے ذریعہ معاش پیدا کرنے کی اسکیمیں۔لیفٹیننٹ گورنر نے صنعتوں کی ضرورت کو پورا کرنے کے لیے ابھرتے ہوئے ہنر مندی کی ترقی کے منظر نامے کے مطابق نوجوانوں اور مزدور افرادی قوت کو اپ سکلنگ اور ری اسکلنگ کی اہم ضرورت پر خصوصی زور دیا۔ انہوں نے ہنر مندی کی ترقی اور ابھرتے ہوئے کاروباری افراد کے لیے مواقع فراہم کرنے کے لیے حکومت کے مکمل نقطہ نظر پر زور دیا۔لیفٹیننٹ گورنر نے قانونی کم از کم اجرت، سماجی تحفظ اور کارکنوں کی صحت کی دیکھ بھال کے لحاظ سے غیر منظم کارکنوں سمیت کارکنوں کے تحفظ کے لیے اقدامات کو مضبوط بنانے پر بھی زور دیا۔لیفٹیننٹ گورنر نے متعلقہ محکموں میں بے روزگار نوجوانوں اور مزدوروں کی رجسٹریشن کے عمل کو ہموار کرنے اور ترقیاتی منصوبوں میں مقامی نوجوانوں کے روزگار کو بہتر بنانے کی ہدایت کی۔