وادی کشمیر میں رواں موسم کی پہلی برفباری

بالائی علاقوں میں سفید چادر بچھ گئی ،میدانی علاقوں میں درمیانہ درجے کی بارشیں
سرینگر لہہ شاہراہ، گریز بانڈی پورہ اور مغل روڑ تازہ برفباری کے بعد ٹریفک کےلئے بند
سرینگر/16اکتوبر///وادی کشمیر میں رواں موسم سرماءکی پہلی برفباری کے بیچ بالائی علاقوں میں سفید چادر بچھ گئی ہے جبکہ میدانی علاقوں میں درمیانہ درجے کی بارشوں سے درجہ حرارت میں مزید گراوٹ دیکھنے کو ملی ہے ۔ ادھر محکمہ موسمیات نے اگلے چوبیس گھنٹوں تک موسم کی صورتحال جوں کی توں رہنے کی پیش گوئی کرتے ہوئے کہا ہے کہ 20اکتوبر تک مطلع ابرآلود رہنے کے ساتھ ساتھ بیچ بیچ میں ہلکی سے درمیانہ درجے کی بارش اور پہاڑی علاقوں میں پھر سے برفباری کا امکان ہے ۔ ادھر سرینگر میں دن کا درجہ حرارت 12اشاریہ صفر ڈگری ریکارڈ کیا گیا جبکہ گزشتہ شب کا درجہ حرارت 6ڈگری سیلسیس ریکارڈکیاگیا ہے ۔ دریں اثناءبالائی علاقوں میں برفباری کے بعدسرینگر لہہ شاہراہ، گریز بانڈی پورہ اور مغل روڑ کوبرفبار ی سے پیدا شدہ پھسلن کے بعد ٹریفک کی نقل وحمل کے لئے بند کردیا گیا ہے اور مسافروں سے کہا گیا ہے کہ وہ رخت سفر باندھنے سے پہلے موسم اور سڑک کی صورتحال کے بارے میں جانکاری حاصل کریں۔ وائس آف انڈیا کے مطابق سوموار کی صبح پھر سے وادی کشمیر کے اونچے علاقوں میں برف باری کا نیا سلسلہ شروع ہوا، جبکہ میدانی علاقوں میں بارش ہوئی، جس کی وجہ سے درجہ حرارت میں نمایاں کمی واقع ہوئی ہے ۔ وادی میں رواں سیزن کی پہلی برفباری کے بعد سونہ مرگ ، زوجیلا درے کے پاس ،گلمرگ کی افروٹ پہاڑیوں اور پہلگام کے علاوہ گریزبانڈی پورہ کے کئی علاقوں میں تازہ برفباری سے ان علاقوں میں سفید چادر بچھ گئی ہے ۔ ادھر رازدان ٹاپ کے علاوہ سادھنا ٹاپ پر بھی نئے سرے سے برفباری دیکھنے کوملی ہے۔بالائی علاقوں میں جہاں ہلکی برفباری ہوئی وہیں سرینگر سمیت ،بڈگام ، گاندربل اور دیگر میدانی علاقوں میںسوموار کی صبح سے ہی درمیانے درجے کی بارشیں ہویں ۔جبکہ وادی کے دیگر علاقوں بشمول ، اننت ناگ، شوپیاں، پلوامہ ، کولگام ادھر شمالی کشمیر کے بارہمولہ ،کپوارہ ، ہندوارہ ، سوپور اور بانڈی پورہ کے میدانی علاقوں میں بھی سوموار کی صبح سے ہی نئے سرے سے بارشیں شروع ہوئیں جو کہ تادم تحریر جاری تھیں۔ جبکہ گزشتہ رات شمالی کشمیر کے کئی علاقوں میں شدید ژالہ باری بھی دیکھنے کو ملی تھی۔یادرہے کہ محکمہ موسمیات نے پہلے ہی 14اکتوبر سے موسم کی ابتر صورتحال کے بارے میں پیش گوئی کی تھی البتہ گزشتہ روز اتوار یعنی 15اکتوبر کو اگرچہ کچھ وقت تک مطلع ابرآلود رہا تاہم سرینگر کے علاوہ متعدد علاقوں میں دن بھر ہلکی دھوپ نکلی تھی تاہم شام دیر گئے کئی علاقوں میں بارشیں شروع ہوئی تھیں۔ برفباری اور مسلسل بارشوں کی وجہ سے سرینگر سمیت وادی بھر میں درجہ حرارت میں مزید گراوٹ آئی اور سرینگر میں آج دن کا زیادہ سے زیادہ درجہ حرارت 12اعشاریہ صفر ریکارڈ کیا گیا جبکہ گزشتہ شب سرینگر میں کم سے کم درجہ حرارت 6ڈگری سیلسیس ریکارڈ کیا گیا تھا۔ دریں اثناءبالائی علاقوں میں برفباری کے بعد شوپیاں ضلع کو راجوری اور پونچھ کے ساتھ ملانے والی واحد سڑک مغل روڑ کو دونوں اطراف ٹریفک کی نقل و حمل کےلئے بندکردیا گیا جبکہ زوجیلا درے پر تازہ برفباری کے بعد سرینگر لہہ شاہراہ پر بھی سوموار کو ٹریفک کےلئے معطل کیاگیا ہے ۔ ادھر گریز بانڈی پورہ روڑ پر تازہ برفباری کے بعد اس روڑپر بھی گاڑیوں کی آمدورفت کو معطل کیاگیا ہے ۔ ادھر محکمہ ٹریفک نے تمام ایسے افراد جو ان راستوں پر سفر کرنے کے خواہاں ہوں سے کہا گیا ہے کہ وہ رخت سفر باندھنے سے قبل ٹریفک اور موسم کی صورتحال کے بارے میں جانکاری حاصل کریں تاکہ بعد میں کوئی پریشانی نہ ہوں۔