جموں: ریاسی میں گاڑی لڑھک گئی تین افراد جاں بحق

جموں/جموں وکشمیر کے ریاسی ضلع کے کراگ علاقے میں نجی گاڑی ڈرائیور کے قابو سے باہر ہو کر گہری کھائی میں جاگری جس کے نتیجے میں گاڑی میں سوار تین افراد کی برسر موقع ہی موت واقع ہوئی۔سرکاری ذرائع نے بتایا کہ ہفتے اور اتوار کی درمیانی شب تحصیل بھوماگ کے کراگ علاقے میں ایکو گاڑی زیر نمبر (JK20C-0599) لڑھک گئی جس کے نتیجے میں تین افراد خون میں لت پت ہوئے۔انہوں نے بتایا کہ مقامی لوگوں اور پولیس نے فوری طورپر امدادی کارروائی شروع کی اور زخمیوں کو علاج ومعالجہ کی خاطر نزدیکی ہسپتال منتقل کیا تاہم ڈاکٹروں نے تین افراد کو مردہ قرار دیا۔متوفین کی شناخت کرنیل سنگھ عرف کرنالو ولد تیرتھ رام ، نصیب سنگھ ولد سوہن لال اور موہن لال ولد سرم چند ساکنان ریاسی کے بطور ہوئی ہے۔پولیس نے معاملے کی نسبت کیس درج کرکے مزید تحقیقات شروع کی۔