اننت ناگ میں سیکورٹی فورسز کے ساتھ تصادم میں دو ملی ٹینٹ ہلاک

شوپیاں کے باس کوچھن گاوں میں مختصر تصادم کے بعد ملی ٹینٹ فورسز کو چکمہ دے کر فرار ہونے میں کامیاب
جنوبی ضلع اننت ناگ کے پوش کریری گاوں میں جنگجووں اور سیکورٹی فورسز کے مابین تصادم میں دو ملی ٹینٹ جاں بحق ہوئے۔ اے ڈی جی پی کشمیر نے بتایا کہ مہلوک ملی ٹینٹ سیکورٹی فورسز پر حملوں اور عام شہریوں کو تشدد کا نشانہ بنانے کی کارروائیوں میں ملوث تھے۔ اطلاعات کے مطابق منگل کے روز سیکورٹی فورسز نے مصدقہ اطلاع موصول ہونے کے بعد اننت ناگ کے پوش کریری گاوں کو محاصرے میں لے کر تلاشی آپریشن شروع کیا۔ ذرائع نے بتایا کہ جوں ہی سیکورٹی فورسز کے اہلکار مشتبہ مقام کے نزدیک پہنچے تو وہاں پر موجود ملی ٹینٹوں نے فورسز پر اندھا دھند فائرنگ شروع کی چنانچہ سیکورٹی فورسز نے بھی پوزیشن سنبھال کر جوابی کارروائی کا آغاز کیا جس دوران کافی دیر تک دوبدو گولیوں کا تبادلہ جار ی رہا۔ ذرائع نے بتایا کہ گولیوں کا تبادلہ تھم جانے کے بعد سیکورٹی فورسز نے تصادم کی جگہ دو ملی ٹینٹوں کی لاشیں برآمد کیں جن کی بعد میں شناخت دانش احمد بٹ عرف کوکب ولد گلزار احمد بٹ ساکن جبلی پورہ بجبہاڑہ اور بشارت نبی لون ولد غلام نبی لون ساکن فتح پورہ اننت ناگ کے بطور ہوئی ہے۔ پولیس ترجمان کے مطابق مہلوک ملی ٹینٹ سیکورٹی فورسز پر حملوں کی منصوبہ بندی کرنے میں ملوث رہے ہیں۔ انہوں نے کہاکہ دونوں سال 2019سے سرگرم تھے اور اُن کی ہلاکت سیکورٹی فورسز کے لئے بہت بڑی کامیابی ہے۔ انہوں نے کہاکہ مہلوک ملی ٹینٹوں نے ہی 6جون 2019کو منظور احمد ساکن سعید پورہ اننت ناگ نامی ٹریٹوریل آرمی اہلکار کا قتل کیا جبکہ 9اپریل 2021کو محمد سلیم کا بھی قتل کرنے کے ساتھ ساتھ دو عام شہریوں کے قتل میں بھی براہ راست ملوث رہے ہیں۔ انہوں نے بتایا کہ تصادم کی جگہ اسلحہ وگولہ بارود اور قابل اعتراض مواد برآمد کرکے ضبط کیا گیا۔ دریں اثنا اے ڈی جی پی کشمیر وجے کمار نے بتایا کہ مہلوک جنگجووں کی ہلاکت سے حزب المجاہدین کو بہت بڑا دھچکا پہنچا ہے۔ انہوں نے کہاکہ دونوں سیکورٹی فورسز پر حملوں کی منصوبہ بندی کرنے اور اُنہیں پایہ تکمیل تک پہنچانے میں پیش پیش تھے جبکہ اُن کے خلاف جرائم کی ایک لمبی فہرست موجود ہے۔ ادھر پولیس نے عوام سے پ±ر زور اپیل کی ہے کہ وہ جائے تصادم پر جانے سے تب تک گریز کیا کریں جب تک ا±سے پوری طرح سے صاف قرار نہ دیا جائے کیونکہ پولیس اور دیگر سلامتی ادارے لوگوں کے جان و مال کی محافظ ہے لہذا لوگوں کی قیمتی جانوں کو بچانے کیلئے پولیس ہر ممکن کوشش کرتی ہے۔ چنانچہ ممکن طور جھڑپ کی جگہ بارودی مواد اگر پھٹنے سے رہ گیا ہو تو ا±س کی زد میں آکر کسی کی جان بھی جاسکتی ہے۔ اسی لئے لوگوں سے بار بار اپیل کی جاتی ہے کہ وہ جھڑپ کی جگہ کا رخ کرنے سے اجتناب کریں۔ لوگوں سے التجا کی جاتی ہے کہ وہ حفاظتی عملے کو اپنا کام بہ احسن خوبی انجام دینے میں بھر پور تعاون فراہم کریں تاکہ کوئی ناخوشگوار واقع پیش نہ آسکیں۔علاوہ ازیں شوپیاں کے باس کوچھن گاوں میں جاری تصادم اختتام کو پہنچا ہے۔ ذرائع نے بتایا کہ رات بھر گاوں کا محاصرہ کرنے کے باوجود بھی ملی ٹینٹ رات کی تاریکی کا فائدہ اُٹھا کر فرار ہونے میں کامیاب ہوئے۔