کرناہ: ضلع ترقیاتی کمشنر کپوارہ کا دورہ، ترقیاتی منصوبوں کا جائزہ

کرناہ // ضلع ترقیاتی کمشنر کپوارہ، ایوشی سودن نے کرناہ کا دورہ کیا، جہاں انہوں نے مختلف ترقیاتی منصوبوں کی پیش رفت کا جائزہ لیا۔ دورے کے دوران انہوں نے نیشنل ہائی وے سمیت دیگر اہم سڑکوں کا معائنہ کیا اور روڈ انفراسٹرکچر سے متعلق جاری اور آئندہ منصوبوں پر بریفنگ لی۔اس موقع پر ایک اعلیٰ سطحی اجلاس بھی منعقد ہوا جس میں ضلعی انتظامیہ، محکمہ تعمیرات عامہ (پی ڈبلیو ڈی)، روڈ اینڈ براڈ ٹریکس اتھارٹی، تحقیق و ترقی کے نمائندگان سمیت دیگر متعلقہ محکموں کے افسران نے شرکت کی۔ اجلاس کا مقصد مختلف ایجنسیوں کے درمیان ہم آہنگی اور مؤثر رابطہ کاری کو فروغ دینا تھا، تاکہ سڑکوں سے متعلق منصوبے بروقت اور مؤثر انداز میں مکمل کیے جا سکیں۔ضلع ترقیاتی کمشنر نے کہا کہ اگرچہ سڑکوں کی توسیع سے موجودہ ڈھانچے متاثر ہوں گے، تاہم اس کے نتیجے میں ٹرانسپورٹ کےاخراجات میں کمی آئے گی اور مقامی معیشت کو فروغ ملے گا۔ اُن کا کہنا تھا کہ "یہ ترقی پورے علاقے کے لیے سودمند ہے اور کپوارہ بھی اس سے مستفید ہوگا۔”انہوں نے بتایا کہ سڑک کو دس میٹر چوڑا کرنے کے لیے پہلے ہی زمین حاصل کی جا چکی ہے، اور جہاں مزید اراضی درکار ہوگی، وہاں مناسب حکمت عملی کے تحت زمین ایکوائر کی جائے گی، خاص طور پر اسٹریٹجک اہمیت کے حامل علاقوں میں۔ ان کے مطابق مقامی لوگ اس عمل میں تعاون کر رہے ہیں اور پیشگی رضامندی کا اظہار بھی کیا گیا ہے۔آخر میں ضلع ترقیاتی کمشنر نے تمام محکموں کو ہدایت دی کہ وہ رہائشیوں اور زمین مالکان سے قریبی رابطہ رکھیں تاکہ منصوبوں میں کسی قسم کی تاخیر یا رکاوٹ نہ آئے اور عوامی مفاد میں روڈ انفراسٹرکچر کے اہداف بروئے کار لائے جا سکیں۔