کشتواڑ کے چھاترو میں سیکورٹی فورسز اور ملی ٹینٹوں کے مابین تصادم جاری

پونچھ کے سرنکوٹ میں گولیوں کا تبادلہ ، تصادم کی جگہ اسلحہ وگولہ بارود برآمد
سرینگر13ستمبر// کشتواڑ کے چھاترو علاقے میں سیکورٹی فورسز اور ملی ٹینٹوں کے مابین انکاونٹر جاری ہے جبکہ پونچھ میں ملی ٹینٹوں اور فورسز کے مابین گولیوں کا تبادلہ ہوا ۔ یو پی آئی کے مطابق ملی ٹینٹوں کی موجودگی کی اطلاع موصول ہونے کے بعد سیکورٹی فورسز نے جمعے کی سہ پہر کشتواڑ کے چھاترو علاقے کو محاصرے میں لے کر تلاشی آپریشن شروع کیا ۔ ذرائع کے مطابق جوں ہی سلامتی عملے کے اہلکار مشتبہ مقام کے نزدیک پہنچے تو وہاں پر موجود ملی ٹینٹوں نے فورسز پر اندھا دھند فائرنگ شروع کی چنانچہ سلامتی عملے نے بھی جوابی کارروائی کا آغاز کیا جس دوران شدید گولیوں کاتبادلہ شروع ہوا۔ ذرائع کا کہنا ہے کہ سیکورٹی فورسز نے ایک وسیع العریض جنگلی علاقوں کو سیل کرکے فرار ہونے کے راستوں پر پہرے بٹھا دئے ہیں۔ دفاعی ذرائع کے مطابق علاقے میںجیش سے وابستہ تین ملی ٹینٹ موجود ہیں جنہیں مار گرانے کی خاطر اضافی کمک کو بھی طلب کیا گیا ہے۔ادھر پونچھ کے سرنکوٹ علاقے میں بھی درمیانی شب سیکورٹی فورسز اور ملی ٹینٹوں کے مابین گولیوں کا تبادلہ ہوا جس کے بعد سیکورٹی فورسز نے تصادم کی جگہ اسلحہ وگولہ بارود اور قابل اعتراض مواد برآمد کیا ہے۔ ذرائع کے مطابق سیکورٹی فورسز نے مفرورملی ٹینٹوں کو تلاش کرنے کی خاطر بڑے پیمانے پر سرچ آپریشن لانچ کیا ہے۔