نئی دہلی کے پرگتی میدان میں منعقدہ بین الاقوامی میلے میں یوم جموں کشمیر کی تقریب کا افتتاح چیف سیکریٹری ڈاکٹر ارون کمار مہتہ نے کیا ۔اس موقعے پر دوسری باتوں کے علاوہ انہوں نے میلے سے لطف اندوز ہونے والے لوگوں جن کی اچھی خاصی تعداد نے جموں کشمیر کے پویلین میں خاصی دلچسپی دکھائی سے اپیل کی کہ وہ وادی کشمیر کی سیر کو ضرور آئیں اور یہاں کے حسین نظاروں ،خوبصورت چراگاہوں ،باغوں ،آسمان سے باتیں کرنے والی برف پوش چوٹیوں ،لہلاتے کھیتوں ،جھرنوں اور آبشاروں کے علاوہ ندی نالوں اور خاص طور پر جھیل ڈل کے بلورین پانیوں ،مغل باغات ،تیرتے گارڈنز ،ہاوس بوٹوں اور دوسرے اسی نوعیت کے نظاروں سے لظف اندوز ہوجائیں۔ کیونکہ یہ دنیا میں ہی جنت کا نظارہ پیش کرتا ہے ۔چیف سیکریٹری نے نمایش میں لگاے گئے کشمیری سٹالوں کا دورہ کیا سٹال لگانے والوں سے باتیں کیں اور انہیں چند مفید مشورے بھی دئے ۔یہ امر قابل ذکر ہے کہ نئی دہلی کے پرگتی میدان مین ہر سال اس طرح کی نمایشوں کا اہتمام کیاجاتا ہے ۔اس نمایش میں جہاں کشمیری سٹال نمایش دیکھنے والوں کی توجہ کا مرکز بنتے ہیں وہیں دوسری اور اب کچھ برسوں سے کشمیری وازہ وان کا سٹال بھی لگایا جارہا ہے اور اس وازہ وان کا لطف اٹھانے کے لئے نہ صرف لوگ وہیں پر واز وان تناول کرتے ہیں بلکہ آرڈر پر گھر بھی لے جاکر دوست احباب کو کھلاتے ہیں ۔نمایش کے مشاہدین ہر سال کشمیری سٹالوں پر رکھی گئیں کشمیری مصنوعات خاص طور پر شالوں ،پیپر ماشی اور دوسری مصنوعات میں خاصی دلچسپی کا مظاہرہ کرتے ہیں لیکن اس موقعے پر کوئی ان کو کشمیر کی خوبصورتی یہاں کے حسن اور یہاں کے لوگوں کے بارے میں نہیں بتاتا تھالیکن اب کی بار نمایش میں آنے والے لوگوں کو از خود چیف سیکریٹری نے کشمیر کی سیاحت پر آنے کی دعوت دی اور لوگوں سے کہا کہ حکومت کشمیر یہاں کی سیر کرنے کے شوقین افراد کو رعایات بھی دے سکتی ہیں۔غرض آج پہلی بار پرگتی میدان میں آنے والوں کو کشمیر کی سیر کرنے کی دعوت دی گئی جو انتہائی عمدہ کام قرار دیا سکتا ہے ۔اس سے لوگوں میں کشمیر کی سیر کرنے کی تڑپ پیدا ہوگئی ہے اور کسی بھی وقت یہاں بڑے بڑے سرمایہ دار نہ صرف سیر کو آینگے بلکہ یہاں ہوسکتا ہے کہ وہ سرمایہ کاری کے بارے میں سوچ سکتے ہیں ۔اس طرح ہماری معیشت مستحکم ہوسکتی ہے جیسا کہ کچھ دن قبل لیفٹننٹ گورنر منوج سنہا نے کہا کہ ہماری معیشت مستحکم ہونے لگی ہے اور جموں کشمیر تعمیر وترقی کے میدان میں بہت آگے بڑھتا جارہا ہے ۔جہاں تک سیاحت کا تعلق ہے تو موجودہ انتظامیہ نے یہاں سیاحت کو فروغ دینے کے لئے بہت سے قابل قدر اقدامات کئے ہیں اور نئے نئے سیاحتی مقامات کی کھوج کی گئی ہے پورے سیاحتی ڈھانچے کو از سر نو منظم کیا ہے جس کا نتیجہ یہ نکلا کہ اس سال آٹھ لاکھ سے زیادہ سیاحوں نے کشمیر کی سیر کی اور یہاں کے قدرتی نظاروں کو اپنی آنکھوں اور یادوں میں سمیٹ لیا ۔اسلئے چیف سیکریٹری نے پرگتی میدان میں جس طرح باہر کے لوگوں کو کشمیر کی سیاحت کی دعوت دی وہ قابل قدر اور قابل سراہنا ہے ۔