ملٹری انجینئر سروسز کے پروبیشنرز نے صدر جمہوریہ ہند سے ملاقات کی

نئی دلی/ ملٹری انجینئر سروسز (ایم ای ایس) کے پروبیشنرز نے آج راشٹرپتی بھون میں صدر جمہوریہ ہند شریمتی دروپدی مرمو سے ملاقات کی۔افسران سے خطاب کرتے ہوئے صدر نے کہا کہ انجینئر کا کردار صرف حساب، ڈیزائننگ اور تعمیر تک محدود نہیں ہے۔ یہ بہت وسیع ہے اور اس میں کمیونٹیز کو جوڑنا، خوابوں کی تعبیر، اور مستقبل کی تشکیل شامل ہے۔ انہوں نے نوجوان افسران سے کہا کہ ان کے پاس ایسا فزیکل انفراسٹرکچر بنانے کی طاقت ہے جو مضبوط اور پائیدار ہو۔ماحولیاتی چیلنجوں اور موسمیاتی تبدیلی کے مسائل کے بارے میں بات کرتے ہوئے صدر نے کہا کہ یہ  ایم ای ایس افسران کا فرض ہے کہ وہ ایسے ڈھانچے کو ڈیزائن اور تعمیر کریں جو ماحول دوست، پائیدار ہوں اور قابل تجدید توانائی کے بڑھتے ہوئے استعمال کو فروغ دیں۔ گرین انجینئرنگ وقت کی ضرورت ہے۔ انہیں یہ جان کر خوشی ہوئی کہ  ایم ای ایس مختلف اقدامات کو اپنا کر قومی کاربن فوٹ پرنٹس کو کم کرنے میں اپنا حصہ ڈال رہا ہے۔ انہوں نے اس اعتماد کا اظہار کیا کہ  ایم ای ایس کے نوجوان افسران نئے خیالات، نئی توانائی اور بہت زیادہ جوش و جذبہ لے کر ان کوششوں کو مزید تقویت دیں گے۔  صدر مملکت نے کہا کہ تمام شعبوں بالخصوص انجینئرنگ کے شعبے میں جدید  ٹکنالوجی کا استعمال بہت ضروری ہے۔ انہوں نے  ایم ای ایس افسران کو مشورہ دیا کہ وہ متحرک پیش رفت میں سب سے آگے رہیں، اور اس بات کو یقینی بنائیں کہ ان کا کام بھی تازہ ترین پیشرفت کی عکاسی کرتا ہے۔صدر مملکت نے کہا کہ ایک ایسے وقت میں جب ہمارا ملک عالمی سطح پر مختلف شعبوں میں نئے معیارات قائم کر رہا ہے، انہیں فخر ہونا چاہیے کہ وہ اس خدمت کا حصہ ہیں جو ملک اور اس کی مسلح افواج کی خدمت کے لیے پرعزم ہے اور خود کو تبدیلیوں کے مطابق ڈھال رہی ہے۔  انہیں یہ اعزاز حاصل ہے کہ انہیں ان بہادر سپاہیوں کی خدمت اور مدد فراہم کرنے کا موقع ملا جو مادر وطن کے لیے جانیں قربان کرنے کے لیے ہمہ وقت تیار رہتے ہیں۔