کانگریس کا دہلی میں’مٹکا پھوڑ‘احتجاج

شدید گرمی سے پریشان لوگوں کو فوری طور پر مناسب مقدار میں پانی فراہم کرانے کامطالبہ
نئی دہلی، یکم مئی (یو این آئی) دہلی پردیش کانگریس نے اتوار کو قومی دارالحکومت کے منڈکا علاقے میں پانی کی کمی کا سامنا کرنے والے لوگوں کے ساتھ ‘مٹکا پھوڑ’ احتجاج کیا اور دہلی حکومت سے شدید گرمی سے پریشان لوگوں کو فوری طور پر مناسب مقدار میں پانی فراہم کرانے کامطالبہ کیا۔مظاہرین سے خطاب کرتے ہوئے دہلی پردیش کانگریس کے ترجمان نریش کمار نے کہا کہ راجدھانی کے دیہی علاقوں کے لوگوں کو بجلی اور پانی کی پریشانی کا سامنا ہے اور کیجریوال حکومت مفت بجلی اور پانی فراہم کرانے کی بات کرکے دہلی کے لوگوں کو گمراہ کررہی ہے۔ڈاکٹر کمار نے کہا کہ آج صبح پارٹی کارکنان نے پانی کے قلت سے پریشان منڈکا علاقے میں ساودا علاقہ کی جے جے کالونی کے لوگوں کے ساتھ مظاہرہ کیا اور دہلی حکومت سے پانی کے بحران کو حل کرنے کی اپیل کی۔ ان کاکہناتھا کہ دہلی کے وزیر اعلی اروند کیجریوال مفت پانی اور بجلی فراہم کرنے کے نام پر گمراہ کررہے ہیں۔ریاستی کانگریس کے سینئر ترجمان نے کہا کہ مسٹر کیجریوال صاف پانی فراہم کرنے کے جھوٹے وعدے کرتے ہیں، لیکن حقیقت اس کے بالکل برعکس ہے۔ انہوں نے کہاتھا کہ لوگوں کو دو دن کے وقفے سے پانی مل رہا ہے اور اس میں بھی جو پانی ان کو دیاجارہا ہے وہ گنداہوتا ہے جس کی وجہ سے لوگ بیمار ہو رہے ہیں۔انہوں نے کہا کہ اس علاقے میں رہنے والے لوگ مالی طور پر کمزور ہیں اوران کے تعلق سے حکومت کی اندیکھی کافائدہ پانی مافیا اٹھا رہے ہیں۔ لوگوں کو ان مافیاوں سے 20-20 روپے میں پانی کی بوتلیں خریدنی پڑرہی ہیں