ڈی سی سرینگر امیرا کدل دھماکہ میں فوت شدہ دوشیزہ کے گھر گئے

کنبہ کو ایک لاکھ روپے کی چیک دی ، پانچ لاکھ مزید دئے جائیں گے
سرینگر/
ڈپٹی کمشنر سرینگر محمد اعجاز اسد نے آج امیراکدل دھماکہ میں مرنے والی دوشیزہ کے گھر جاکر ان کے کنبہ کے ساتھ ہمدری ظاہر کی ۔ ڈی سی سرینگر کے ہمراہ ایس ایس پی راکیش بلوال بھی تھے ۔ مہلوک دوشیزہ رافیہ نذیر جو کہ صدر بل حضرتبل کی رہنے والی تھی گزشتہ دنوں امیراکدل میں اُس وقت زخمی شدید زخمی ہوئی تھی جب وہاں پر ایک گرنیڈ کا زور دار دھماکہ ہوا ۔ رافیہ نذیر گزشتہ روز زخموں کی تاب نہ لاکر ہسپتال میں دم توڑ بیٹھی تھی۔ اس موقعے پر مہلوک دوشیزہ کے غم زدہ کنبہ کے افراد کے ساتھ بات کرتے ہوئے ڈی سی سرینگر نے ان کے ساتھ ہمدردی کااظہار کیا ۔ اس موقعے پر انہوںنے سوگواراں کو یقین دلایا کہ گورنمنٹ کی طرف سے انہیں ہر ممکن مدد فراہم کی جائے گی۔ اس دوران ڈی سی موصوف نے رافیہ کے والد نذیر احمد ٹنڈا کو بطور ایکس گریشا ایک لاکھ روپے کی چیک دی اور کہا کہ مرکزی معاونت والی سکیم کے تحت انہیں مزید 5لاکھ روپے فراہم کئے جائیں گے ۔ ڈی سی موصوف کے ہمراہ ایس ایس پی نے متاثرہ کنبہ کو یقین دلایا کہ اس واقعے میں ملوث ملزمین کو سخت سے سخت سزادی جائے گی۔