موجودہ دور میں خواتین اپنے لئے جگہ بنارہی ہیں

خواتین کو مساوی مواقعے فراہم کرنے میں دنیا کی ترقی مضمر ۔ فاروق خان
عالمی یوم نسواں کے موقعے پر لیفٹیننٹ کے صلاحکار فاروق خان نے بتایا ہے کہ صنفی مساوات نہ صرف ایک بنیادی انسانی حق ہے بلکہ ایک پُر امن خوشحال اور پائیدار دنیا کےلئے ایک ضروری بنیاد ہے ۔ انہوںنے کہا کہ موجودہ دور میں سب سے بڑی سماجی تبدیلی خواتین کو یکساں حقوق فراہم کرنے میں ہی مضمر ہے ۔ انہوںنے بتایا کہ جنس کے درمیان عدم مساوات کو ختم کرنے سے ہی ہمارے ملک کی خواتین کو مناسب پہنچان مل رہی ہے ۔ سرینگر کے ٹائیگور ہال میں یوم خواتین کے موقعے پر منعقدہ ایک تقریب سے خطاب کرتے ہوئے مشیر خان نے کہا کہ کسی بھی ترقی پسند معاشرے کےلئے یہ ضروری ہے کہ خواتین کو اظہار رائے کا حق ملے اور ہر شعبہ میں برابر جگہ ملے کیوں کہ وہ گھر کا سنگ بنیاد ہے اور اس کی مضبوطی سے ہی گھر بھی مضبوط ہوگا۔ انہوں نے کہا کہ پوری دنیا تب ترقی کرے گی جب قومیں اور تنظیمیں اس بات کو یقینی بنانے کے لیے کام کریں گی کہ ہر عورت کو ترقی کے یکساں مواقع فراہم کیے جائیں۔اس سال کے عالمی یوم خواتین کے تھیم ’تعصب کو توڑنا‘ پر روشنی ڈالتے ہوئے مشیر فاروق خان نے کہا کہ وہ وقت گزر گیا جب خواتین کے خلاف تعصب ہوا کرتا تھا۔ انہوں نے مزید کہا کہ دنیا جو پہلے مردوں کی بالادستی تھی اب بدل چکی ہے اور خواتین آج کے جدید دور میں اپنے لیے جگہ بنا رہی ہیں اور زندگی کے تمام شعبوں میں اپنی طاقت کا منصفانہ حصہ حاصل کر رہی ہیں۔مختلف شعبوں میں جموں و کشمیر کے تعاون کو واضح کرتے ہوئے مشیر خان نے کہا کہ جموں و کشمیر کی خواتین قوم کی تعمیر میں اپنی مسلسل اور تعمیری کوششوں سے مختلف شعبوں میں نمایاں اثر ڈال رہی ہیں۔مشیر نے کہا کہ خواتین نے کاروبار، کھیل، تعلیم، زراعت، انجینئرنگ، اختراعات اور میڈیکل کے شعبوں میں جموں و کشمیر کے ساتھ ساتھ ملک کا قد بھی بلند کیا ہے۔
مشیر خان نے اس موقع پر جموں سے تعلق رکھنے والی رخشندہ مہک کی بھی ستائش کی جس نے پیرس ورسیلیز، فرانس میں منعقدہ ورلڈ ڈیف جوڈو چیمپئن شپ میں کانسی کا تمغہ جیتا تھا۔ انہوں نے وہیل چیئر باسکٹ بال کھلاڑی انشاءبشیر کی ملک کا سر فخر سے بلند کرنے پر بھی تعریف کی۔انہوں نے مزید کہا کہ خواتین ہمارے معاشرے کے لیے روشنی کا مینار ہیں اور انہیں ان کے خوابوں کی تعبیر سے کوئی نہیں روک سکتا، انہوں نے مزید کہا کہ وہ ’نیا جموں و کشمیر اور نیا بھارت‘ کا چہرہ ہوں گی۔اس موقع پر خطاب کرتے ہوئے ڈویڑنل کمشنر کشمیر پانڈورنگ کے پول نے کہا کہ دنیا بدل رہی ہے اور خواتین ہر میدان میں اپنا حصہ ڈال رہی ہیں اور ہر سطح پر اپنا حصہ ڈال رہی ہیں اور حکومت نے خواتین کو بااختیار بنانے کے لیے کئی اسکیمیں شروع کی ہیں۔