لداخ میں دو سال سے جاری فوجی تعطل ختم کرنے کی کوششیں

ہندوستان اور چین کے درمیان محاذ آرائی ختم کرنے کیلئے بات چیت ہوگی
نئی دہلی: ۸ مارچ (یو این آئی) مشرقی لداخ میں گزشتہ تقریباً دو سال سے جاری فوجی تعطل کو حل کرنے کیلئے ہندوستان اور چین کے کور کمانڈروں کے درمیان بات چیت کا 15 واں دور 11 مارچ کو ہوگا۔ اعلیٰ دفاعی ذرائع نے یہاں بتایا کہ مذاکرات کا 15واں دور ہندوستان کی طرف واقع چوشول مولڈو میں ہوگا۔ دونوں افواج کے کور کمانڈرز کے درمیان اب تک مذاکرات کے 14 دور ہو چکے ہیں۔ نتیجے کے طور پر پینگاگ جھیل، وادی گلوان اور گوگرا گرم چشمہ کے علاقوں کے شمالی اور جنوبی کنارے میں تعطل سے متعلق مسائل حل ہو گئے ہیں۔ اب محاذ آرائی کے بقیہ مسائل کے حل کیلئے فریقین کے درمیان بات چیت ہوگی۔ ذرائع کا کہنا ہے کہ دونوں فریقین کی جانب سے ان مسائل کا باہمی طور پر قابل قبول حل تلاش کرنے کے حوالے سے بیانات حوصلہ افزا اور مثبت ہیں۔واضح رہے کہ مئی 2020 میں چین کی طرف سے مشرقی لداخ میں لائن آف کنٹرول کو یکطرفہ طور پر تبدیل کرنے کی کوششوں کی وجہ سے یہ تعطل پیدا ہوا۔ ہندوستان نے چین کی اس کوشش کی سخت مخالفت کی تھی۔ اس تعطل کے نتیجے میں 15 جون کو وادی گلوان میں دونوں فوجوں سپاہیوں کے درمیان پرتشدد جھڑپ ہوئی تھی جس میں 20 ہندوستانی فوجی مارے گئے تھے جبکہ 40 سے زیادہ چینی فوجی مارے گئے تھے۔اس کے بعد سے دونوں ممالک کے درمیان وقتاً فوقتاً حکومتی، سفارتی اور فوجی سطح پر تعطل کے حل کے لیے بات چیت ہوتی رہی ہے۔