افغانستان میں زلزلہ، ہلاک ہونےوالوں کی تعداد 22 تک پہنچ گئی

قلعہ نو(یو این آئی/ژنہوا) افغانستان کے مغربی صوبے بادغیس میں 5.6 شدت کے زلزلے کے بعد مرنے والوں کی تعداد بڑھ کر 22 ہو گئی ہے ۔ صوبے کے ایک عہدیدار نے منگل کو یہ اطلاع دی۔ بادغیس صوبے کے انفارمیشن اینڈ کلچر کے ڈائریکٹر باز محمد سروری نے ژنہوا کو بتایا، "ہمارے مقامی ذرائع سے تازہ ترین اعداد و شمار سے پتہ چلتا ہے کہ ضلع قادیس میں پیر کو آنے والے زلزلے میں 22 افراد ہلاک اور پانچ زخمی ہوئے "۔اہلکار کے مطابق پڑوسی ضلع مقر کے ساتھ ساتھ صوبائی دارالحکومت قلعہ نو کے قادیس میں بھی کم از کم ایک ہزار مکانات تباہ ہو گئے ہیں۔ انہوں نے کہا، "مقامی اہلکار بادغیس میں متاثرہ علاقوں کا دورہ اور صورتحال کی نگرانی کر رہے ہیں۔ وہ متاثرہ لوگوں کو امداد فراہم کرنے کے کام کو مربوط کرنے کی کوشش کریں گے ۔اس سے قبل کی اطلاعات میں کہا گیا تھا کہ زلزلے میں 12 افراد ہلاک ہوئے ہیں۔امریکی جیولوجیکل سروے نے بتایا کہ ترکمانستان کی سرحد سے متصل افغانستان کے صوبہ بادغیس کے دارالحکومت قلعہ نو سے 40 کلومیٹر مشرق میں 5.6 شدت کا زلزلہ آیا۔ زلزلے کا مرکز 34.9479 ڈگری شمالی عرض البلد اور 63.5686 ڈگری مشرقی طول البلد میں 10 کلومیٹر کی گہرائی میں واقع تھا۔ زلزلے کے بعد علاقے میں مزید جھٹکے محسوس کیے گئے ۔