دہلی میں اومیکرون کے چار نئے معاملوں کی تصدیق

نئی دہلی(یواین آئی) قومی دارالحکومت دہلی میں جمعرات کو کورونا وائرس کی نئی قسم او میکرون سے متاثر چار اور نئے معاملے سامنے آئے ۔ اس کے ساتھ ہی دارالحکومت میں اومیکرون سے متاثر معاملوں کی تعداد بڑھکر دس ہوگئی ہے ۔افسروں نے یہ اطلاع دی۔لوک نائک جے پرکاش اسپتال کے میڈیکل ڈائریکٹر ڈاکٹر سنیل کمار نے یو این آئی کو بتایا کہ متاثرین کو پچھلے پفتے اندرا گاندھی بین الاقوامی ہوائی اڈے پر کووڈ 19 جانچ میں متاثر پائے جانے کے بعد اسپتال میں داخل کیا گیا تھا۔ جس کے بعد ان کے نمونے کو نینوم سیکوینسنگ کے لئے بھیجا گیا تھا۔ جس میں آج چار لوگ اومیکرون سے متاثر پائے گئے ۔ڈاکٹر کمار نے کہا،“دو مرد اور دو خواتین مریض جنہیں ہمارے اسپتال میں داخل کرایا گیا تھا،اب ان میں اومیکرون کی تصدیق ہوئی ہے ۔سبھی مریض نوجوان ہیں اور مکمل طورپر ٹیکے لگوا چکے ہیں۔سبھی متاثرین میں اس مرض کی ابھی تک کوئی علامت نہیں نظر آئی ہے ۔”انہوں نے کہا کہ سبھی اومیکرون متاثر ملکوں سے یہاں آئے ہیں۔ یہ لوگ جنوبی افریقہ ،سویڈن اور دبئی سے آئے ہیں۔واضح رہے کہ اس سے پہلے دہلی میں منگل کو اومیکرون سے متاثر چار معاملے سامنے آئے تھے ۔ڈاکٹر کمار نے کہا،“اس ہفتے اومیکرون کے ایک مریض کو صحت مند ہونے کے بعد اسپتال سے چھٹی دے دی گئی ہے ،جبکہ دیگر نو متاثرہ مریضوں کا علاج ہمارے فیسیلٹی سینٹر میں چل رہا ہے ۔