میر بازار میں تین منشیات فروش گرفتار، بھاری مقدار میں نشہ آور مواد برآمد

کولگام، یکم اکتوبر:
منشیات کے خلاف جاری مہم کے دوران کولگام پولیس کو ایک اور بڑی کامیابی حاصل ہوئی ہے۔ میر بازار علاقے میں کی گئی ایک مؤثر کارروائی کے دوران پولیس نے تین بدنامِ زمانہ منشیات فروشوں کو گرفتار کر کے ان کے قبضے سے بھاری مقدار میں نشہ آور مواد برآمد کیا۔یہ کارروائی انچارج پولیس پوسٹ میر بازار کی قیادت میں ایک خصوصی پولیس پارٹی نے انجام دی، جو کہ ایڈیشنل ایس پی قومی شاہراہ قاضی گنڈ کولگام، منتاز علی بھٹی (جے کے پی ایس) کی نگرانی میں باغ سکلو، میر بازار میں معمول کی گشت پر مامور تھی ۔پولیس کے مطابق، دورانِ گشت تین مشتبہ افراد نے پولیس کو دیکھ کر فرار ہونے کی کوشش کی، تاہم پولیس پارٹی نے مستعدی کا مظاہرہ کرتے ہوئے انہیں فوری طور پر گرفتار کر لیا۔تلاشی کے دوران، ان کے قبضے سے 80 گرام چرس اور 2.7 کلوگرام تازہ بھنگ کے پتے برآمد کیے گئے، جنہیں انہوں نے مہارت سے چھپا رکھا تھا۔گرفتار افراد کی شناخت زاہد بشیر بٹ ولد بشیر احمد بٹ، ساکن بونہ پورہ نمبل اننت ناگ،عدیل احمد وانی ولد محمد اقبال وانی ساکن کھانڈے پورہ کرنگسو، اننت ناگ اور
رضوان احمد ایتو ولد نذیر احمد ایتو ساکن ہانگل پہالو، پہلگام، اننت ناگ کے طور پر ہوئی ھے۔
پولیس سٹیشن قاضی گنڈ میں ایف آئی آر نمبر 201/2025 کے تحت متعلقہ دفعات کے تحت مقدمہ درج کر کے مزید تفتیش شروع کر دی گئی ہے۔ پولیس نے کہا ہے کہ وہ گرفتار شدگان کے روابط اور ممکنہ تعلقات جنوبی کشمیر میں سرگرم منشیات کے بڑے نیٹ ورکس کے ساتھ بھی کھوج رہی ہے۔
اس موقع پر سینئر سپرنٹنڈنٹ آف پولیس کولگام، ساحل سرنگال (آئی پی ایس) کے مطابق، "منشیات صرف ایک امن و امان کا مسئلہ نہیں بلکہ ہماری آنے والی نسلوں کے لیے ایک سنگین خطرہ ہے۔ کولگام پولیس نے منشیات کے خلاف زیرو ٹالرنس پالیسی اپنائی ہے، اور ہم عوام کے تعاون سے اس ناسور کو جڑ سے ختم کرنے کے لیے پرعزم ہیں۔”
پولیس نے ایک بار پھر عوام سے اپیل کی ہے کہ وہ منشیات سے متعلق کسی بھی مشتبہ سرگرمی کی اطلاع قریبی پولیس سٹیشن یا ہنگامی نمبر 112 پر دیں۔ پولیس نے یقین دہانی کرائی ہے کہ اطلاع دہندگان کی شناخت صیغہٴ راز رکھا جاۓ گا۔