اسرو کا ذیلی ادارہ امریکی سیٹلائٹ لانچ کرنے کے لیے تیار

نئی دہلی،/ بھارتی خلائی تحقیقاتی تنظیم (اسرو( کے تجارتی شعبہ، نیو اسپیس انڈیا لمیٹڈ (این ایس آئی ایل)، مئی 2025 میں امریکی کمپنی اے ایس ٹی اسپیس موبائل کے سیٹلائٹ کو لانچ کرنے کی تیاری کر رہا ہے۔ اس مشن میں اسرو کا لانچ وہیکل مارک۔3 (ایل وی ایم-3) راکٹ استعمال ہوگا، جو تقریباً چھ ٹن وزنی بلو برڈ بلاک۔2 سیٹلائٹ کو نچلے زمینی مدار میں پہنچائے گا۔اے ایس ٹی اسپیس موبائل کا مقصد خلا میں پہلا عالمی سیلولر براڈ بینڈ نیٹ ورک قائم کرنا ہے، جو براہ راست موبائل ڈیوائسز کو کنیکٹیویٹی فراہم کرے گا۔ کمپنی کی منصوبہ بندی کے مطابق، مستقبل میں 50 سے زائد سیٹلائٹس لانچ کیے جائیں گے تاکہ عالمی سطح پر براڈ بینڈ خدمات کی فراہمی ممکن ہو سکے۔این ایس آئی ایل کے چیئرمین اور منیجنگ ڈائریکٹر ڈی رادھا کرشنن کے مطابق، اس مشن کے لیے تیاریاں جاری ہیں، اور مستقبل میں مزید سیٹلائٹس کی لانچنگ کے لیے بھی بات چیت ہو رہی ہے۔ اسرو کے ایل وی ایم-3 راکٹ نے اس سے قبل یورپی کمپنی یوٹل سیٹ ون ویب کے 72 سیٹلائٹس کو کامیابی سے مدار میں پہنچایا تھا۔اس مشن کے لیے ایل وی ایم-3 راکٹ کی تیاری جاری ہے، اور 15 مارچ 2025 کو اسرو کے چیئرمین ڈاکٹر وی نارائنن نے تمل ناڈو میں اسرو پروپلشن کمپلیکس سے راکٹ کے کریوجینک اپر اسٹیج کو روانہ کیا۔اس کے علاوہ، این ایس آئی ایل نے آسٹریلوی-بھارتی اسپیس مشینز کمپنی کے ساتھ بھی معاہدہ کیا ہے، جس کے تحت پولر سیٹلائٹ لانچ وہیکل (پی ایس ایل وی( اور اسمال سیٹلائٹ لانچ وہیکل (ایس ایس ایل وی) راکٹس کے ذریعے 2026-2027 میں سیٹلائٹس لانچ کیے جائیں گے۔ ایس ایس ایل وی راکٹ اسپیس مشینز کمپنی کے 450 کلوگرام وزنی دوسرے آپٹیمس اسپیس کرافٹ کو مدار میں پہنچائے گا، جو اب تک کا سب سے بڑا آسٹریلوی ڈیزائن کردہ اور تیار کردہ اسپیس کرافٹ ہے۔