جموں وکشمیر میں سیاحتی سرگرمیاں:2سالوں میں 4 کروڑ48لاکھ سیاحوں کی آمد

 ایک لاکھ20ہزار غیر ملکی اور 4کروڑ46لاکھ گھریلو سیاح شامل
فروغ سیاحت پر35.08 کروڑ روپے خرچ ،59 اثاثے آو ¿ٹ سورس:حکومت
سری نگر / جموں و کشمیر حکومت نے منگل کو قانون ساز اسمبلی کو مطلع کیا کہ گزشتہ2 سالوں کے دوران ایک لاکھ20ہزار غیر ملکیوں سمیت 4 کروڑ48لاکھ سیاحوں نے جموں و کشمیر کا دورہ کیا۔جے کے این ایس کے مطابق ممبر اسمبلی عیدگاہ مبارک گل کے ایک سوال کے تحریری جواب میں، انچارج وزیر سیاحت، عمر عبداللہ نے ایوان کو بتایا کہ2023 میں 2 کروڑ 12لاکھ اور 2024 میں2 کروڑ 36لاکھ سیاحوں نے جموں و کشمیر کا دورہ کیا۔انہوںنے کہاکہ ان میں سے 2023 میں55337 اور 2024 میں 65452غیر ملکی سیاحوں نے جموں و کشمیر کا دورہ کیا۔عمرعبداللہ نے تحریری جواب میں مزید کہاکہ2023 میں 2 کروڑ11لاکھ اور2024 میں2 کروڑ35لاکھ گھریلو سیاحوں نے جموں و کشمیر کا دورہ کیا۔حکومت نے انکشاف کیا کہ گزشتہ2 مالی سالوں کے دوران محکمہ سیاحت کی جانب سے فروغ، اشتہارات اور متعلقہ سرگرمیوں کے لیے35.08 کروڑ روپے خرچ کیے گئے ہیں،جس میں سے 14.14 کروڑ روپے 2023-24 میں اور 20.94 کروڑ روپے 2024-25 میں خرچ ہوئے۔ انچارج وزیر سیاحت، عمر عبداللہ نے یہ بھی کہا کہ گزشتہ2سالوں میں محکمہ سیاحت کے59 اثاثے آو ¿ٹ سورس کیے گئے یعنی ٹھیکے پر دئیے گئے ہیں۔