سپیکر نے قانون سازوں کی طرف سے اُٹھائے گئے مسائل کا جائزہ لینے کیلئےہاﺅس کمیٹی میٹنگ کی صدارت کی

سپیکر جموں وکشمیر قانون ساز اسمبلی عبدالرحیم راتھر کی صدارت میں ہاﺅس کمیٹی میٹنگ آج یہاں منعقد ہوئی جس میں قانون ساز اسمبلی کے مختلف ارکان کی طرف سے اُٹھائے گئے مسائل پر غور و خوض کیا گیا۔اراکین اسمبلی سنیل کمار شرما (قائد حزب اِختلاف)، غلام احمد میر، نذیر احمد خان (گریزی)، سرجیت سنگھ سلاتھیہ، علی محمد ڈار، جاوید حسن بیگ، چودھری محمد اکرم اور وحید الرحمان پرہ کمیٹی کے ارکان کی حیثیت سے موجود تھے۔کمیٹی نے جموں و کشمیر کے دونوں دارالخلافوں میں قیام کے دوران اراکین اسمبلی کو درپیش رہائش اور دیگر متعلقہ مسائل پر تبادلہ خیال کیا۔کمیٹی نے ارکانِ اسمبلی کو جموں اور سری نگر میں درپیش رہائشی مسائل سمیت دیگر متعلقہ امور پر تفصیلی گفتگو کی۔ اَرکان نے تجویز دی کہ اُنہیں مناسب رہائشی سہولیت فراہم کرنے کے لئے اَقدامات کئے جائیں ۔اُنہوں نے یہ بھی تجویز دی کہ نئے اِنتظامات ہونے تک ممبران اسمبلی کو الاٹمنٹ کے لئے سرکاری کوارٹروں کی نشاندہی کرنے کا عمل شروع کیا جانا چاہیے تاکہ عوامی میٹنگوں اور قانون ساز اِجلاسوں کے دوران کسی قسم کی پریشانی کا سامنا نہ کرنا پڑے۔سپیکر موصوف نے یقین دِلایا کہ تمام جائز مطالبات بالخصوص رہائش کے مسائل جلد از جلد حل کرنے کے لئے حکومت کے ساتھ اُٹھایا جائے گا۔ اُنہوں نے اُمید ظاہر کی کہ یہ معاملات مقررہ مدت میں حل کئے جائیں گے۔میٹنگ میں سیکرٹری جموں و کشمیر قانون ساز اسمبلی منوج کمار پنڈت اور دیگر سینئر اَفسران موجود تھے۔