اقتصادی اور سلامتی کے مفادات کیلئے بڑا چیلنج
مسٹر اڈانی کےخلاف بدعنوانی کے الزامات سے متعلق معاملے پر پارلیمنٹ میں پہلے بحث کی جائے : کانگریس
نئی دہلی، پارلیمنٹ کے سرمائی اجلاس سے پہلے اتوار کے روز منعقدہ کل جماعتی میٹنگ میں کانگریس نے متنازعہ صنعت کار گوتم اڈانی کے خلاف بدعنوانی کے مقدمے سمیت منی پور میں تشدد، شمالی ہندوستان میں آلودگی کا مسئلہ، ٹرین حادثہ وغیرہ کے مسائل پر بحث کا مطالبہ کیا ہے ۔میٹنگ کے بعد کانگریس لیڈر پرمود تیواری نے نامہ نگاروں کو بتایا کہ پارٹی نے آل پارٹی میٹنگ میں ان مسائل پر پارلیمنٹ میں بحث کرانے کا مطالبہ کیا ہے ۔ انہوں نے کہا کہ پارٹی چاہتی ہے کہ پیر سے شروع ہونے والے سرمائی اجلاس میں ان تمام مسائل کو سب سے پہلے اٹھایا جائے اور مسٹر اڈانی کے خلاف بدعنوانی کے الزامات سے متعلق معاملے پر پہلے بحث کی جائے ۔انہوں نے کہا کہ متنازعہ صنعت کار پر الزام ہے کہ انہوں نے مبینہ طور پر سیاست دانوں اور بیوروکریٹس کو 2,300 کروڑ روپے سے زیادہ کی رشوت دی تاکہ وہ اپنی کمپنی کے ذریعہ شمسی توانائی کے منصوبوں کے لیے سودے حاصل کر سکیں۔ انہوں نے یہ بھی کہا کہ یہ ملک کے اقتصادی اور سلامتی کے مفادات سے جڑا ہوا سنگین مسئلہ ہے اور ملک کی پارلیمنٹ میں اس پر گہری بحث ہونی چاہیے ۔واضح رہے کہ پارلیمنٹ کا سرمائی اجلاس 25 نومبر سے 20 دسمبر تک چلے گا جس میں 16 بل پر بحث ہونے کا امکان ہے ۔ ان میں وقف ترمیمی بل بھی شامل ہے ، جس کے بارے میں اپوزیشن کا الزام ہے کہ جگدمبیکا پال کی سربراہی میں بنائی گئی مشترکہ پارلیمانی کمیٹی (جے پی سی) کے چیئرمین اس سے متعلق اجلاسوں میں خلل ڈال رہے ہیں، اس لیے جے پی سی کو مزید وقت دینے پر غور کیا جانا چاہئے ۔
