مودی غریبوں کی بستی اڈانی کو دینا چاہتے ہیں لیکن وہ ایسا نہیں ہونے دیں گے: راہل گاندھی

ممبئی: ۷۱ نومبر (ایجنسیز) کانگریس کے سابق صدر اور لوک سبھا لیڈر راہل گاندھی نے بی جے پی اور مودی پر شدید حملہ کیا ہے۔راہل گاندھی نے کہا ہے کہ وزیر اعظم نریندر مودی کچی بستی کو صنعتکار اڈانی کے حوالے کرنا چاہتے ہیں اور وہ ان کی خواہش پوری نہیں ہونے دیں گے۔ راہل گاندھی نے فیس بک اور انسٹاگرام پر اپنی ایک پوسٹ میں کہا کہ نریندر مودی ممبئی کی غریبوں کی سب سے بڑی کچی بستی دھاراوی کو صنعتکار اڈانی کو دینا چاہتے ہیں لیکن وہ غریبوں کے ساتھ کھڑے ہیں اور اس کچی بستی کے ساتھ ایسا نہیں ہونے دیں گے۔ انہوں نے کہاکہ وزیر اعظم دھاراوی میں اڈانی کو ایک لاکھ کروڑ روپے دینا چاہتے ہیں لیکن میں ایسا نہیں ہونے دوں گا۔ مہاراشٹر کے غریب لوگوں کی حفاظت کے لیے، میں مضبوطی سے کھڑا ہوں۔“ واضح رہے دھاراوی ایک انتخابی موضوع بن گیا ہے۔