کووڈ سے ہونے والی اموات پر 50000 روپے کا معاوضہ دیں :مدراس ہائی کورٹ

چنئی(یو این آئی) سپریم کورٹ کے حکم کے مطابق، مدراس ہائی کورٹ نے پیر کو تمل ناڈو اور پڈوچیری کی حکومت کو ہدایت دی کہ وہ کووڈ انفیکشن سے اپنی جان گنوانے والوں کے لواحقین کو کم از کم 50،000 روپے کا معاوضہ ادا کرے ۔ جسٹس سنجیب بنرجی اور جسٹس پی ڈی آدیکیساوالو پر مشتمل ہائی کورٹ کی پہلی بنچ نے مفاد عامہ کی عرضی پر عبوری فیصلہ دیتے ہوئے تمل ناڈو اور پڈوچیری کی حکومتوں سے کہا ہے کہ وہ متاثرین کے لواحقین کو 50,000 روپے کا معاوضہ ادا کریں، جیسا کہ سپریم کورٹ نے تجویز کیا ہے ۔ ڈیزاسٹر مینجمنٹ ایکٹ 2005 کے تحت سپریم کورٹ نے کم از کم 50,000 روپے کی رقم کا حکم دیا تھا، جب کہ ریاستی حکومتیں اس رقم سے زیادہ امداد دینے کے لیے آزاد ہیں۔ بنچ نے کہا کہ دونوں حکومتوں کو ایک ہفتے میں فیصلہ کرنا ہوگا کہ آیا وہ ریاستی آفات ریلیف فنڈ سے 50,000 روپے سے زیادہ کا معاوضہ ادا کرنے کو تیار ہیں۔