حالات بدل گئے ، ملٹنی اور اعلیحدگی پسندی ختم ہونے کے قریب

تین خاندانوں نے جموں کشمیر کو تباہ کیا تھا ، لوگ اب سیاست میں تبدیلی کے متمنی
بی جے پی ہی جموں کشمیر ریاست کا درجہ بحال کرسکتی ہے۔ وزیر اعظم کا ڈوڈہ میں چناوی ریلی سے خطاب
سرینگر//وزیر اعظم نریندر مودی نے دوڈہ میں چناوی جلسے سے خطاب کرتے ہوئے کہا کہ جموں کشمیر کی تقدیر یہاں کے نوجوانوں کے ہاتھوں میں ہیں ۔ انہوںنے بتایا کہ حالات بدل چکے ہیں اور ملٹنسی اور اعلیحدگی ختم ہونے کے قریب ہے تاہم یہاں پر آج بھی خاندانی سیاست جموں کشمیر کو پھر سے اپنے جال میں پھانسا چاہیں۔ انہوںنے بتایا کہ جموں کشمیر کو ریاست کا درجہ صرف بی جے پی ہی دے سکتی ہے اور اس نام پر یہاں کے لوگوں کو خاندانی سیاست والے گمراہ کررہے ہیں ۔ وائس آف انڈیا کے مطابق وزیر اعظم نریندر مودی نے آج جموں و کشمیر کے ڈوڈہ میں ایک بڑے جلسہ عام سے خطاب کیا۔ اس دوران وزیر اعظم نے اپوزیشن جماعتوں پر شدید حملہ کیا۔ وزیر اعظم مودی نے کہا کہ جموں و کشمیر کو مکمل ریاست کا درجہ دینے کا کام صرف بی جے پی حکومت ہی کرے گی۔ لیکن آپ کو ایسے لوگوں سے ہوشیار رہنا ہوگا، جو اپنی خود غرضی کی وجہ سے آپ کے حقوق چھین رہے ہیں۔پی ایم مودی نے کہاکہ اس بار جموں و کشمیر کے اسمبلی انتخابات تین خاندانوں اور جموں و کشمیر کے نوجوانوں کے درمیان ہیں۔ یہ تین خاندان… ایک خاندان کانگریس سے ہے، ایک خاندان نیشنل کانفرنس سے ہے اور ایک خاندان پی ڈی پی سے ہے۔ ان تینوں خاندانوں نے مل کر آپ کے ساتھ جو کچھ کیا وہ کسی گناہ سے کم نہیں۔ یہ تینوں خاندان برسوں سے جموں و کشمیر کو برباد کرنے کے ذمہ دار ہیں۔ گزشتہ برسوں میں جموں و کشمیر میں ترقی کا ایک نیا دور آیا ہے۔ اس کا کریڈٹ یہاں کے نوجوانوں کو ہی جاتا ہے۔ آج میں جموں و کشمیر کے نوجوانوں کے جوش اور جذبے کو سلام کرتا ہوں، چاہے وہ بیٹیاں ہوں یا بیٹے۔پی ایم مودی نے کہا کہ 2000 کے بعد یہاں پنچایتی انتخابات نہیں ہوئے تھے، بی ڈی سی انتخابات یہاں کبھی نہیں ہوئے۔ کئی دہائیوں تک اقربا پروری نے یہاں کے بچوں اور ہونہار نوجوانوں کو آگے نہیں آنے دیا۔