حج کمیٹی آف انڈیا نے صوبائی حج کمیٹیوں، حج سے وابستہ سرکاری و غیر سرکاری تنظیموں، پاسپورٹ آفس کی تعطیلات، بعض ریاستوں/علاقوں میں شدید بارش کے سبب حج درخواست فارم جمع کرنے کی تاریخ میں توسیع کر دی ہے
نئی دہلی: حج کمیٹی آف انڈیا نے صوبائی حج کمیٹیوں، حج سے وابستہ سرکاری و غیر سرکاری تنظیموں، پاسپورٹ آفس کی تعطیلات، بعض ریاستوں/علاقوں میں شدید بارش کے سبب نظام زندگی کے متاثر ہونے اور خود عازمینِ حج کے شدید مطالبے پر حج درخواست فارم جمع کرنے کی تاریخ میں توسیع کی ہے۔
وزارتِ اقلیتی امور حکومتِ ہند میں ڈائریکٹر اور حج کمیٹی آف انڈیا کے سی ای او ڈاکٹر لیاقت علی آفاقی آئی آر ایس نے بتایا کہ حج کمیٹی آف انڈیا کے تحت حج پر جانے کے خواہشمند عازمین اب 23 ستمبر 2024 تک حج کمیٹی آف انڈیا کی ویب سائٹ یا موبائل پر ’حج سوویدھا ایپ‘ کے ذریعے آن لائن درخواست بھر سکتے ہیں۔
ڈاکٹر آفاقی نے درخواست دہندگان کو ہدایتی مشورہ دیا کہ حج فارم بھرنے سے پہلے گائیڈ لائنز حج 2025 اور حلف نامہ کا پوری توجہ سے مطالعہ کر لیں۔ سی ای او حج کمیٹی آف انڈیا نے خواہشمند عازمین سے گزارش کی ہے کہ توسیع شدہ تاریخ تک حج درخواست فارم ضرور جمع کر دیں، چونکہ اب تاریخ میں توسیع تقریباً ناممکن ہے۔
انہوں نے کہا کہ وزارتِ حج و عمرہ مملکتِ سعودی عربیہ کی ہدایت و خواہش کے مطابق حج 2025 کے تمام انتظامی امور اکتوبر تک مکمل کر لیے جائیں گے۔ ڈاکٹر آفاقی نے عازمین سے مزید اپیل کی کہ حج 2025 کے لیے بنائے گئے نظام الاوقات پر ضرور عمل کریں، تاکہ ویزے کی حصولیابی، رہائش، ہوائی ٹکٹ اور دیگر انتظامات وقت پر صحیح سے مکمل ہو سکیں۔
ڈاکٹر آفاقی نے مزید بتایا کہ اب تک تقریباً 115000 (ایک لاکھ پندرہ ہزار) عازمین حج 2025 کے لیے رجسٹریشن کر چکے ہیں، جن میں مہاراشٹر، گجرات، کیرالہ، اتر پردیش اور کرناٹک سے بالترتیب سب سے زیادہ عازمین حج کے لیے رجسٹریشن کرا چکے ہیں۔ جبکہ تقریباً 2500 (ڈھائی ہزار) سے زائد بغیر محرم کے خاتون عازمین حج کے لیے رجسٹریشن کرا چکی ہیں۔
ڈاکٹر آفاقی نے کہا کہ عازمین کسی بھی معلومات اور دشواری کے حل کے لیے صرف حج کمیٹی آف انڈیا کی ویب سائٹ اور ریاستی حج کمیٹیوں کے دفاتر سے رابطہ کریں یا حج کمیٹی آف انڈیا کے ہیلپ لائن نمبر 22107070 -022 سے معلومات حاصل کریں۔
