سالہاسال سے جاری جمہوریت کا فقدان عوام کُش ثابت: عمر عبداللہ

نیشنل کانفرنس حلقہ انتخاب گاندبل کا ایک خصوصی اجلاس پارٹی کے ضلعی آفس مجاہد منزل گاندربل میں ایک غیر اجلاس پارٹی نائب صدر عمر عبداللہ کی صدارت میں منعقد ہوا۔ اجلاس میں پارٹی ٹریجرر شمی اوبرائے، ضلع صدر غلام نبی راتھر، انچارج کانسچونسی شیخ غیاث الدین اور دیگر عہدیداران بھی موجود تھے۔ اس دوران آنے والے اسمبلی انتخابات کی تیاریوں کا جائزہ لیا گیا اور پارٹی لائحہ عمل اور تنظیمی پروگراموں میں پر تبادلہ خیالات کرنے کے علاوہ لوگوں کو درپیش مسائل و مشکلات بھی زیر بحث آئے۔ اجلاس میں سبھی شرکاءنے اپنی اپنی آراءپیش کی اور کہا کہ لوگوں کو بجلی، پانی، راشن اور سڑک کی صورت میں زبردست مشکلات کا سامنا ہے اور انتظامیہ کاغذی گھوڑے دوڑانے میں مصروف ہے۔ اس دوران عمر عبداللہ نے پارٹی سے وابستہ افراد کو کمربستہ ، پُرعزم اور ثابت قدم رہنے کی ہدایت کرتے ہوئے کہاکہ سالہاسال سے جمہوریت کے فقدان نے عوام کو زبردست مسائل و مشکلات سے دوچار کردیا ہے اور یہ سلسلہ ہر گزرتے دن کیساتھ بڑھتا جارہا ہے۔ اُمید ہے کہ اسمبلی انتخابات میں جموں وکشمیر کے عوام نیشنل کانفرنس کو اپنی بھر پور حمائت دیں گے اور ہمیں اپنی خدمات اور راحت کاری کا موقعہ فراہم کریں گے۔ انہوں نے کہا کہ میرا سیاسی سفر گاندربل سے ہی شروع ہوا ہے اور مجھے خوشی ہے کہ مجھے یہاں کے عوام کی ایک بار پھر نمائندگی کرنے کا موقع ملا ہے، میں آپ کی خدمت کرنے کیلئے پُرعزم ہوں ۔ انہوں نے پارٹی لیڈران، عہدیداران اور کارکنوں اور پارٹی حامیوں سے اپیل کی کہ وہ متحد ہوکر کام کریں اور پارٹی کا انتخابی منشور گھر گھر پہنچائیں۔ اجلاس میں زونل یوتھ صدر مشتاق میر، میڈیا انچارج گاندربل صائم مصطفےٰ اور دیگر عہدیداران بھی موجود تھے۔