کشمیر میں جنم اشٹمی کا تہوار تزک و احتشام سے منایا گیا

سری نگر وادی کشمیر میں بھی پنڈت برادری سے وابستہ لوگوں نے جنم اشٹمی کا تہوار مذہبی جوش و جذبے اور تزک و احتشام سے منایا۔اس سلسلے میں یہاں ٹنکی پورہ میں واقع کتھلیشور مندر سے مذہبی نعروں کی گونج میں شوبا یاترا نکالی گئی جو سخت سیکورٹی بندوبست کے بیچ حبہ کدل، گنپتھ یار، بربرشاہ، ریگل چوک، ہری سنگھ ہائی سٹریٹ، جہانگیر چوک اور لالچوک سے گذری۔یاترا میں روایتی لباس میں ملبوس بچوں سمیت عقیدت مندوں کی ایک اچھی تعداد نے شرکت کی۔اس شوبھا یاترا میں شامل شرکائمذہبی ترانے اور بجھن کیرتن گا رہے تھے ، اس کے علاوہ فورسز کیمپوں میں بھی فوجی اہلکاروں کی جانب سے خصوصی پوجا پاٹ کی محفلیں منعقد ہوئیں۔مقامی پنڈتوں کا کہنا ہے کہ اس تہوار کے ساتھ وادی کشمیر میں گرمی کی شدت میں کمی آنا شروع ہوتی ہے ۔انتظامیہ نے یاترا کے پر امن انعقاد کو یقینی بنانے کے لئے سیکورٹی کے سخت ترین انتظامات کئے تھے ۔ایک کشمیری پنڈت نے بتایا کہ اپنی اکثریتی کیمونٹی کا شکریہ ادا کرتا ہوں ، ان کے تعاون کے بغیر اس جھانکی کو نکالنا ناممکن تھا۔ انہوں نے کہاکہ یہاں کی اکثریتی کیمونٹی ہمیشہ سے ہی اپنی اقلیتی کیمونٹی کا خیال رکھتی آئی ہے ، ان کے بعد ہم یہاں کی انتظامیہ کا بھی شکریہ ادا کرتے ہیں۔ہندو ویلفیئر سوسائٹی کشمیر کے ایک عہدیدار نے اس مقدس موقعے پر ملک و جموں وکشمیر میں امن و ترقی کے لئے دعا کی۔انہوں نے کہا کہ کشمیر میں مذہبی رواداری اور بھائی چارے کی روایت تا ابد قائم و دائم رہنی چاہئے ۔دریں اثنا جموں میں بھی جنم اشٹمی کا تہوار عقیدت و احترام کے ساتھ منایا گیا اور عقدیت مندوں نے مندروں میں حاضر ہو کر پوجا اور دعائیں کیں۔