امرناتھ یاترا۔۔۔9 دنوں میں 1.59 لاکھ یاتری مقدس  گپھا کے درشن کئے

 سرینگر/ 29 جون سے اب تک 1.59 لاکھ سے زیادہ یاتریوں نے امرناتھ یاترا کو کامیابی کے ساتھ انجام دیا ہے اور   شیو لنگ کے  درشن کئے۔حکام نے بتایا کہ شدید بارش اور پٹریوں کی پھسلن کی وجہ سے یاترا کو کل عارضی طور پر روک دیا گیا تھا، پھر بھی 7,552 یاتریوں نے مقدس  گپھاکے اندر ’درشن‘ کئے۔انہوں نے بتایا کہ 5,019 مرد یاتری، 1,406 خواتین یاتری، 118 سادھو اور تین سادھویاں ان لوگوں میں شامل تھیں جنہوں نے  گپھا کی عبادت گاہ پر سجدہ کیا۔ اس کے علاوہ، 869 سیکورٹی اہلکاروں، تین خواجہ سراؤں اور 134 بچوں نے یاترا کی۔حکام نے مزید کہا کہ اس کے ساتھ ہی جنوبی کشمیر ہمالیہ میں 3,888 میٹر بلند  گپھاکی زیارت کرنے والے  یاتریوں کی تعداد اب 1,59,498 تک پہنچ گئی ہے۔دریں اثنا، 6,145 یاتریوں کی تازہ کھیپ (11 ویں) آج جموں کے بھگوتی نگر یاتری نواس سے وادی کے لیے دو حفاظتی قافلوں میں روانہ ہوئی۔اس بیچ میں 4695 مرد، 1218 خواتین، 19 بچے، 177 سادھو اور 36 سادھویاں (خواتین سادھو) شامل ہیں۔ یاتری آج صبح 238 گاڑیوں کے قافلے میں بیس کیمپ سے روانہ ہوئے۔ محکمہموسمیات  نے یاترا کے دونوں راستوں پر جزوی طور پر ابر آلود موسم کی پیش گوئی کی ہے اور دن میں وقفے وقفے سے ہلکی بارش اور گرج چمک کے ساتھ بارش کا امکان ہے۔یاتری یاترا کو انجام دینے کے لیے یا تو 48 کلومیٹر طویل روایتی پہلگام راستہ اختیار کرتے ہیں یا 14 کلومیٹر طویل بالتل راستہ۔پہلگام کا راستہ استعمال کرنے والوں کو  گپھا تک پہنچنے میں چار دن لگتے ہیں جب کہ بالتال کے راستے سے گزرنے والے گپھا کے اندر ’درشن‘ کرنے کے بعد اسی دن بیس کیمپ واپس آتے ہیں۔