دفاع، سلامتی اور صنعتی تعاون کے وسیع امور پر مذاکرات

وزیر دفاع راجناتھ سنگھ آج برطانیہ کے دو روزہ دورے پرروانہ ہوں گے
نئی دہلی/وزیر دفاع راج ناتھ سنگھ پیر کو انگلینڈ کے دو روزہ دورے پر روانہ ہوں گے۔ وزارت دفاع نے اتوار کو ایک بیان جاری کرتے ہوئے کہا کہ وزیر دفاع کے ساتھ وزارت دفاع کا ایک اعلیٰ سطحی وفد بھی جائے گا، جس میں ڈیفنس ریسرچ اینڈ ڈیولپمنٹ آرگنائزیشن (ڈی آر ڈی او)، سروس ہیڈ کوارٹرز، محکمہ دفاع اور دفاعی پروڈکشن کے محکمے کے اعلیٰ حکام شامل ہوں گے۔دورے کے دوران وزیر دفاع اپنے برطانوی ہم منصب گرانٹ شاپس کے ساتھ دو طرفہ ملاقات کریں گے ۔ توقع ہے کہ دونوں رہنما دفاع، سلامتی اور صنعتی تعاون کے وسیع امور پر بات چیت کریں گے ۔مسٹر سنگھ کی برطانوی وزیر اعظم رشی سنک سے ملاقات اور خارجہ، دولت مشترکہ اور ترقیاتی امور کے وزیر ڈیوڈ کیمرون سے بھی ملاقات متوقع ہے ۔ وہ برطانیہ کی دفاعی صنعت کے سی ای اوز اور انڈسٹری لیڈروں سے بھی بات چیت کریں گے اور وہاں ہندوستانی کمیونٹی سے بھی ملیں گے ۔