پلوامہ میں غیر مقامی مزدور کی ہلاکت کے واقعے کی تحقیقات کی جا رہی ہے:دلباغ سنگھ

سری نگر/جموں وکشمیر کے پولیس سربراہ دلباغ سنگھ کا کہنا ہے کہ جنوبی کشمیر کے ضلع پلوامہ میں غیر مقامی مزدور کی ہلاکت کے واقعے کے بارے میں تحقیقات کی جارہی ہے۔انہوں نے کہا کہ اس واقعے میں ملوث لوگوں کو جلد ہی سزا دی جائے گی۔پولیس کے مطابق جنوبی کشمیر کے ضلع پلوامہ کے تمچی ناﺅ پورہ علاقے میں پیر کے روز جنگجوﺅں نے ایک غیر مقامی مزدور کو گولیاں مار کر ہلاک کر دیا۔موصوف پولیس سربراہ نے اس واقعے کے بارے میں بات کرتے ہوئے میڈیا کو بتایا: ‘اس واقعے کی ایڈیشنل ڈائریکٹر جنرل آف پولیس کشمیر کی قیادت میں تحقیقات ہو رہی ہے اور تفصیلات دستیاب ہورہی ہیں’۔انہوں نے کہا: ‘ایک غریب مزدور جو روزی روٹی کے لئے یہاں کام کر رہا تھا کو نشانہ بنانے کی حرکت کو نہ اللہ تعالیٰ، نہ ہی لوگ اور نہ ہی ہم معاف کر سکتے ہیں’۔ان کا کہنا تھا: ‘اس کیس کو دیکھا جا رہا ہے اور اس میں ملوث لوگوں کو جلد ہی سزا دی جائے گی’۔انہوںنے مزید بتایا کہ جموں خاص کر وادی کشمیر میں سیکورٹی فورسز کسی بھی چیلنج کا مقابلہ کرنے کے لئے تیار ہیں۔ ان کے مطابق پلوامہ اور سری نگر حملوں میں ملوث ملی ٹینٹوں کو بہت جلد کیفر کردار تک پہنچایا جائے گا۔ پولیس سربراہ نے کہاکہ حالات پر نظر گزر رکھی جارہی ہیں اور کسی کو بھی پر امن حالات میں رخنہ ڈالنے کی اجازت نہیں دی جائے گی۔ یو این آئی