دھوکہ دہی کے الزام میں دو افراد کے خلاف چارج شیٹ دائر: کرائم برانچ کشمیر

سری نگر، 12 اگست (یو این آئی) کرائم برانچ کشمیر نے دھوکہ دہی کے الزام میں دو افراد جن میں سے ایک مفرور ہے، کے خلاف سری نگر کی ایک عدالت میں چارج شیٹ دائر کی ہے۔کرائم برانچ کشمیر کے ایک ترجمان نے اپنے ایک بیان میں کہا کہ اقتصادی جرائم ونگ سری نگر (کرائم برانچ کشمیر) نے ایف آئی آر زیر نمبر 27/2021 میں آر پی سی کے دفعات 420,568,471 اور120 – B کے تحت قابل سزا جرائم میں مبینہ طور ملوث ہونے پر برج ناتھ بٹ ولد آنجہانی تارا چند بٹ ساکن اندرا نگر سری نگر (حال ہاﺅس نمبر 156 امت نگر، موتھی جموں) اور غلام محمد شیخ ولد عبدالاحد شیخ ساکن سچن بوںٹ بیروہ بڈگام کے خلاف سری نگر کی عدالت میں چارج شیٹ دائر کی ہے۔بیان میں کہا گیا: ‘کرائم برانچ کو ایک تحریری شکایت موصول ہوئی جس میں الزام لگایا کہ ملزم برج ناتھ بٹ نے غلام محمد شیخ (زمین دلال) کے ساتھ مل کر گلاب باغ، پاندچھ سری نگر میں واقع 1 کنال 10 مرلہ اراضی (زیر خسرہ نمبر 749 اور میوٹیشن نمبر1554) کے پلاٹ کے سلسلے میں شکایت کنندہ اور اس کے بھائی کے ساتھ بیچنے کا معاہدہ کیا تھا’۔بیان کے مطابق اس معاہدے کے مطابق شکایت کنندہ نے ملزم برج ناتھ بٹ کے بینک اکاﺅنٹ میں 47 لاکھ 20 ہزار روپیے ٹرانسفر کئے تھے اور پوری رقم وصول کرنے کے باوجود بھی ملزمین شکایت کنندہ کو زمین ٹرانسفر کرنے میں ناکام ہوئے۔موصوف ترجمان نے کہا: ‘شکایت میں مزید الزام لگایا کہ ملزمان اپنے معلوم پتے سے فرار ہیں اور انہوں نے اپنے موبائل نمبر بھی تبدیل کئے ہیں’۔انہوں نے کہا: ‘اس سلسلے میں سال 2021 میں کرائم برانچ کشمیر کے پولیس اسٹیشن میں کیس درج کرکے تحقیقات شروع کی گئیں’۔بیان میں کہا گیا: ‘تحقیقات کے دوران جمع شدہ حقائق اور نا قابل ترید شواہد کے بنیاد پر ملزمان کے خلاف کیس کو ثابت ہونے پر ختم کیا گیا اور اس طرح ملزموں کے خلاف عدالتی فیصلے کے لئے عدالت میں چارج شیٹ دائر کی گئی’۔بیان کے مطابق کلیدی ملزم برج ناتھ بٹ جو فرار ہے، کی غیر موجودگی میں سی آر پی کے سیکشن 512 کے تحت چارج شیٹ دائر کی گئی۔بیان کے مطابق مفرور ملزم برج ناتھ بٹ کو تلاش کرنے کے لئے اخباروں میں ایک نوٹس بھی شائع کی گئی ہے۔