دفعہ 370 آئین میں عارضی تھا جس کو ہٹانے میں کانگریس ناکام ہوا: ڈاکٹر جتندرا سنگھ

سری نگر/ بی جے پی کے سینئر لیڈر اور مرکزی وزیر ڈاکٹر جتندر ا سنگھ کا کہنا ہے کہ جموں و کشمیر میں وزیر اعظم نریندر مودی نے پہلی بار تین سطحی پنچایتی نظام قائم کیا۔انہوں نے کہا کہ دفعہ 370 آئین میں عارضی تھا جس کو ہٹانے میں کا نگریس ناکام ہوئی لیکن بی جے پی نے اس کو ہٹا دیا۔موصوف مرکزی وزیر نے ان باتوں کا اظہار پیر کے روز یہاں نامہ نگاروں کے سوالوں کے جواب دینے کے دوران کیا۔انہوں نے کہا: ‘جموں و کشمیر میں پہلی بار وزیر اعظم نریندر مودی نے زمینی سطح پر جمہوریت قائم کی جو یہاں پہلے نہیں تھی’۔دفعہ 370 کی تنسیخ کے بارے میں پوچھے جانے پر ان کا کہنا تھا کہ یہ دفعہ آئین میں عارضی تھا جس کو بی جے پی نے ہٹایا۔انہوں نے کہا: ‘جس آئین میں دفعہ 370 لکھا ہوا تھا اسی آئین میں یہ بھی لکھا تھا کہ یہ دفعہ عارضی ہے بلکہ ملک کے پہلے وزیر اعظم پنڈت جواہر لال نہرو نے بھی آئین ساز اسمبلی میں کہا تھا کہ یہ دفعہ عارضی ہے اور یہ ختم ہوگا’۔ان کا کہنا تھا کہ کانگریس کی حکومتیں اپنے سیاسی مفادات کے پیش نظر اس کو نہیں ہٹا سکے جس کو بعد میں بی جے پی نے ہٹا دیا جس کے لئے کانگریس کو بی جے پی کا شکر گذار رہنا چاہئے۔یونفارم سول کوڈ کے بارے میں پوچھے جانے پر مسٹر سنگھ نے کہا: ‘اس پر بات چیت چل رہی ہے’۔مرکزی وزیر نے مزید بتایا کہ وزیر اعظم نریندر مودی کی سربراہی میں جموں وکشمیر ترقی کی راہ پر گامزن ہے۔ انہوں نے کہاکہ جموں وکشمیر میںامن و سکون واپس لوٹ آیا ہے جبکہ لوگ بھی آزاد فضاوں میں سانس لے رہے ہیں۔ انہوں نے مزید بتایا کہ جموں وکشمیر کے لوگوں کو تمام تر سہولیات میسر رکھنے کی خاطر موجودہ مرکزی حکومت کوشاں ہے اورا س حوالے سے زمینی سطح پر اقدامات اُٹھائے جارہے ہیں۔ یو این آئی