زیروبرج راجباغ کا دورہ کرے دوران افسران کو چوکنا رہنے کی ہدایت
سرینگر/
جموں کشمیر کے لیفٹیننٹ گورنر منوج سنہا نے سیلابی صورتحال کا از خود مشاہدہ کرنے کی غرض سے راجباغ زیرو برج کا دورہ کیا جہاں پر انہوں نے دریائے جہلم میں پانی کے بہاﺅ اور سطح کا معائینہ کیا ۔ سرکاری بیان کے مطابق لیفٹیننٹ گورنر منوج سنہا نے آج زیرو برج کا دورہ کیا اور سیلاب سے نمٹنے کی مجموعی تیاریوں کا جائزہ لیا۔محکمہ آبپاشی اور فلڈ کنٹرول کے افسران کے ساتھ بات چیت کرتے ہوئے لیفٹیننٹ گورنر نے پانی کی سطح کی مسلسل نگرانی کرنے اور تمام ایجنسیوں کو حقیقی وقت میں قبل از وقت وارننگ دینے کی ہدایت دی۔
چیف انجینئر، آبپاشی اور فلڈ کنٹرول نے لیفٹیننٹ گورنر کو بریفنگ دی کہ تمام متعلقہ فریقوں کی جانب سے ہنگامی صورتحال سے نمٹنے کے لیے مناسب اقدامات کیے گئے ہیں۔محکمہ آئی اینڈ ایف سی نے پانی کی سطح کو حقیقی وقت پر مانیٹر کرنے کے لیے دریائے جہلم پر پانچ خودکار واٹر لیول ریکارڈرز اور نو اس کی معاون ندیوں پر نصب کیے ہیں۔ پانی کی سطح کا تجزیہ کیا جاتا ہے اور تمام اسٹیک ہولڈرز تک پہنچایا جاتا ہے۔لیفٹیننٹ گورنر کو بتایا گیا کہ اب سیلاب کی صورتحال ٹل گئی ہے، سنگم میں پانی کی سطح کم ہوگئی ہے اور صورتحال قابو میں ہے۔لیفٹیننٹ گورنر نے پی ایم ڈی پی فیز (II) کے کاموں کی پیشرفت کے بارے میں بھی دریافت کیا اور محکمہ کو ہدایت دی کہ وہ سیلاب سے نمٹنے کے کاموں میں تیزی لائیں خاص طور پر فلڈ سپل چینل پر تاکہ عوام کی جان و مال کی حفاظت کی جاسکے۔لیفٹیننٹ گورنر کے ساتھ لیفٹیننٹ گورنر کے پرنسپل سکریٹری ڈاکٹر مندیپ کمار بھنڈاری بھی تھے۔
