فاسٹ ٹیگ کے آغاز سے ٹول وصولی میں نمایاں اضافہہوا ہے۔ گڈکری

 نئی دلی/۔مرکزی سڑک ٹرانسپورٹ اور شاہراہوں کے وزیر جناب نتن گڈکری نے کہا کہ پچھلے نو سالوں میں ملک میں قومی شاہراہوں کی کل لمبائی میں تقریباً 59 فیصد اضافہ ہوا ہے۔ اس توسیع کے نتیجے میں، بھارت اب امریکہ کے بعد دوسرا سب سے بڑا سڑک نیٹ ورک رکھتا ہے۔آج نئی دہلی میں ایک پریس کانفرنس سے خطاب کرتے ہوئے جناب گڈکری نے کہا 2013-14 میں قومی شاہراہوں کی کل لمبائی 91,287 کلومیٹر تھی، جو 2022-23 میں بڑھ کر 1,45,240 کلومیٹر ہو گئی، جو کہ اس مدت کے دوران 59 فیصد سے زیادہ کا اضافہ ہے۔ انہوں نے یہ بھی کہا کہ گزشتہ نو سالوں میں 4 لین  نیشنل ہائی وے  میں تقریباً دو گنا اضافہ ہوا ہے۔ 2013-14 میں 4 لین  نیشنل ہائی وے  کی یہ لمبائی 18,371 کلومیٹر تھی جو پچھلے نو سالوں میں بڑھ کر 44,654 کلومیٹر ہو گئی ہے۔ سکریٹری ایم او آر ٹی ایچ شری انوراگ جین اور این ایچ اے آئی کے چیئرمین شری سنتوش کمار یادو بھی پریس کانفرنس میں موجود تھے۔ شری گڈکری نے کہا کہ  فاسٹ ٹیگ کے متعارف ہونے سے ٹول وصولی میں نمایاں اضافہ ہوا ہے۔ وزیر نے مزید بتایا کہ ٹول سے حاصل ہونے والی آمدنی 2022-23 میں بڑھ کر 41,342 کروڑ روپے ہوگئی جو 2013-14 میں 4,770 کروڑ روپے تھی۔ جناب گڈکری نے مزید کہا کہ حکومت کا مقصد ٹول ریونیو کو 2030 تک 1,30,000 کروڑ روپے تک بڑھانا ہے۔جناب گڈکری نے کہا کہ اس کے نتیجے میں ٹول پلازوں پر انتظار کا وقت بھی کم ہوا ہے۔ 2014 میں ٹول پلازوں پر انتظار کا وقت 734 سیکنڈ تھا جب کہ 2023 میں یہ گھٹ کر 47 سیکنڈ رہ گیا ہے۔ ہمیں امید ہے کہ ہم اسے جلد ہی 30 سیکنڈ تک لے آئیں گے۔وزیر نے ہندوستان میں سفری تجربات پر  فاسٹ  ٹیگکے تبدیلی کے اثرات کے بارے میں بات کرتے ہوئے کہا کہ اس نے نقد لین دین کی ضرورت کو ختم کرتے ہوئے ٹول ادائیگیوں کے تصور میں انقلاب برپا کر دیا ہے۔ ایک تحقیق کے مطابق، اس پیش رفت سے تقریباً 70,000 کروڑ روپے ٹول پلازوں پر انتظار کرنے کی وجہ سے ضائع ہونے والے ایندھن کے اخراجات میں بچ گئے ہیں۔جناب گڈکری نے کہا کہ شمال مشرقی خطہ میں روڈ ہائی وے نیٹ ورک کی توسیع پر خصوصی زور دیا جا رہا ہے، انہوں نے کہا کہ اس خطے میں 2 لاکھ کروڑ روپے سے زیادہ کے منصوبے چلائے جا رہے ہیں۔ انہوں نے یہ بھی کہا کہ  نیشنل ہائی وےز کے ساتھ ساتھ ایک خوشگوار تجربہ فراہم کرنے کے مقصد سے 670 سڑک کنارے سہولیات تیار کی جا رہی ہیں۔وزیر نے کہا کہ  نیشنل  ہائی وے اتھارٹی نے  انوائٹ(انفراسٹرکچر انویسٹمنٹ ٹرسٹ)ماڈل کے تحت، ایک بانڈ کا ایشو شروع کیا گیا اور اسے زبردست ردعمل ملا۔ ممبئی اسٹاک ایکسچینج میں اس کی دستیابی کے پہلے دن کے اندر، بانڈ نے سات بار اوور سبسکرپشن دیکھا۔ جناب نتن گڈکری نے سرمایہ کاروں پر زور دیا کہ وہ  انوائٹ میں سرمایہ کاری کرنے پر غور کریں، جو روایتی بینک کی شرحوں کو پیچھے چھوڑتے ہوئے 8.05 فیصد کی پرکشش شرح سود پیش کرتا ہے۔ مزید برآں، انہوں نے کہا،  نیشنل  ہائی وے  اتھارٹی  نے سات عالمی ریکارڈز حاصل کیے، جو کہ تکنیکی ترقی کے لیے اپنی وابستگی اور ہندوستان کو امریکہ کے بعد دنیا کے دوسرے سب سے بڑے روڈ نیٹ ورک کے طور پر پوزیشن دینے کے لیے اپنے عزم کو ظاہر کرتے ہیں۔