کرائم برانچ کشمیر کی طلبا کو لوٹنے کے الزام میں دو افراد کے خلاف چارج شیٹ پیش

سری نگر/ کرائم برانچ کشمیر نے سری نگر میں ایوی ایشن اور ہاسپٹیلیٹی کورس فراہم کرانے کے بہانے پر طلبا کو لوٹنے کے الزام میں دو افراد کے خلاف چارج شیٹ دائر کی ہے۔کرائم برانچ کی اقتصادی جرائم ونگ نے یہ چارج شیٹ سری نگر کی ایک پیسنجر ٹیکس عدالت میں داخل کی ہے۔ونگ کے ایک ترجمان نے اپنے ایک بیان میں کہا: ‘برانچ کی اقتصادی ونگ نے پولیس اسٹیشن کرائم برانچ کشمیر (اب اقتصادی جرائم ونگ سری نگر) میں آر پی سی کے دفعات 420، 120B کے تحت ایک ایف آئی آر میں نذیر احمد وانی ساکن تراگ پورہ بارہمولہ حال غزالی آباد ایچ ایم ٹی شالہ ٹینگ گھاٹ اور شبنم فیاض ساکن اومپورہ کے خلاف سری نگر کی پیسنجر ٹیکس کی عدالت میں چارج شیٹ داخل کی ہے’۔انہوں نے کہا کہ یہ کیس وزیر اعلیٰ کی شکایت سیل کی طرف سے موصول ہونے والی ایک تحریری مواصلت پر درج کیا گیا تھا اور بعد میں محکمہ شہری ہوا بازی جموں وکشمیر سے بھی ایک اور مواصلت موصول ہوئی تھی۔بیان میں کہا گیا: ‘مواصلت میں الزام لگایا گیا تھا کہ طلبا نے انٹر نیشنل کالج آف ایوی ایشن باغات برزلہ (جو تسلیم شدہ ہے نہ رجسٹرڈ ہے) میں ایوی ایشن اور ہاسپٹیلیٹی کورس کرانے کے لئے بھاری رقم ادا کی ہے’۔انہوں نے کہا کہ اس سلسلے میں ایک کیس درج کرکے تحقیقات شروع کی گئیں۔بیان میں کہا گیا کہ تحقیقات کے دوران یہ بات سامنے آگئی کہ پروپرائٹر انٹرنیشنل کالج آف ایوی ایشن باغات برزلہ سری نگر نے مذکورہ کالج کو حکومت کے ریگولیٹری حکام سے رجیسٹریشن حاصل کئے بغیر ہی اپنی سطح پر قائم کیا ہے۔انہوں نے کہا: ‘یہ بھی معلوم ہوا کہ مذکورہ پروپرائٹر نے کورس سرٹیفکیٹس پر مختلف لوگو چسپاں کئے ہیں’۔موصوف ترجمان نے بیان میں کہا: ‘ملزم مالک نے طلبا کو روشن مستقبل اور ملازمت کے تحفظ کے بلند کرکے دھوکہ دیا’۔انہوں نے کہا: ‘مزید بر آں ،مالک و منیجنگ ڈائریکٹر نذیر احمد وانی نے غیر تسلیم شدہ انٹرنیشنل کالج آف ایوی ایشن باغات برزلہ میں شش ماہی اور یک سالہ کورس کرانے کی آڑ میں طلبا کو ورغلایا اور اس طرح ان سے بھاری رقوم بٹوریں اور دھوکہ دہی سے طلبا (شکایت کنندگان) کو نقصان پہنچایا’۔ انہوں نے کہا: ‘ملزمین کے خلاف پی آر سی کے دفعہ420 ، 120B کے تحت جرم ثابت ہوچکا ہے اور اس کے مطابق عدالتی فیصلہ کے لئے پیسنجر ٹیکس سری نگر کی عدالت میں چارج شیٹ پیش کی گئی’۔یو این آئی