اتر پردیش مےں رشوت خوری کا ویڈیو وائرل ہونے کے بعد آئی پی ایس افسر کے خلاف تحقیقات شروع

لکھنو¿،13مارچ /اتر پردیش کے ڈائریکٹر جنرل آف پولیس (ڈی جی پی) نے ایک وائرل ویڈیو کی تحقیقات کا حکم دیا ہے، جس میں ایک آئی پی ایس افسر انیرودھ سنگھ مبینہ طور پر رشوت کا مطالبہ کر رہے ہیں۔ پولیس کمشنر وارانسی سے کہا گیا ہے کہ وہ اس ویڈیو کی صداقت کی تصدیق کریں، جو تقریباً دو سال پرانا ہے۔ پولیس کمشنر اگلے تین دن میں اپنی رپورٹ پیش کریں گے۔انیرودھ سنگھ فی الحال سپرنٹنڈنٹ آف پولیس (میرٹھ دیہی) کے عہدے پر تعینات ہیں۔ یہ ویڈیو اس وقت کا ہے جب انیرودھ سنگھ وارانسی میں ایڈیشنل سپرنٹنڈنٹ آف پولیس کے عہدے پر تعینات تھے۔ میرٹھ ضلع میں ایس پی (دیہی) کے طور پر تعینات آئی پی ایس افسر انیرودھ سنگھ کا ایک ویڈیو وائرل ہو رہا ہے، جس میں وہ ویڈیو کال کے ذریعے ایک شخص سے بات کرتے نظر آ رہے ہیں۔ مذکورہ ویڈیو کی بنیاد پر انیرودھ سنگھ پر بدعنوانی کے الزامات لگائے جا رہے ہیں۔انیرودھ سنگھ کی بیوی آئی پی ایس افسر آرتی سنگھ سے متعلق ایک شکایت کی بھی انکوائری کا حکم دیا گیا ہے۔ ایک ٹوئٹ کے ذریعے ڈی جی پی ہیڈ کوارٹر کو اس الزام کے بارے میں معلوم ہوا ہے کہ وارانسی میں ڈپٹی کمشنر آف پولیس کے طور پر تعینات آرتی سنگھ نے فلیٹ کے مالک کو کرایہ ادا نہیں کیا ہے۔ تاہم پوچھ گچھ کے بعد پتہ چلا کہ وہ کرایہ پہلے ہی ادا کر چکیں ہیں۔ وارانسی کے پولیس کمشنر اس معاملے کی جانچ کر کے تین دن کے اندر رپورٹ پیش کریں گے۔