ووٹنگ کے تینوں مراحل ختم ،اب صرف کاونٹنگ

اسمبلی انتخابات کا تیسرا اور آخری مرحلہ بحسن خوبی اختتام پذیر ہوا ۔سات اضلاع میں قایم 5060پولنگ سٹیشنوں میں سے بیشتر پر صبح سویرے ہی ووٹروں کی لمبی لمبی قطاریں مشاہدے میں آئیں ۔جو بے صبری سے اپنی باری کا انتظار کرتے رہے تاکہ اپنے ووٹ کاسٹ کرسکیں۔سب سے زیادہ لمبی قطاریں سمبل سونا واری علاقے میں دیکھی گئیں ۔اطلاعات کے مطابق اس ایریا میں صبح سات بجے سے پہلے ہی ووٹر پولنگ سٹیشنوں کے باہر کھڑے اپنی باری کا انتظار کررہے تھے ۔اس سے یہ ظاہر ہوا کہ لوگ ووٹ ڈالنے کے لئے کس قدر بے تاب لگ رہے تھے ۔شمالی کشمیر کے دیگر علاقوں میں بھی بھاری تعداد میں ووٹر پولنگ سٹیشنوں کے باہر نظر آئے لیکن سمبل سونا واری میں حالات کچھ اور ہی نظر آرہے تھے ۔بہت سے پولنگ سٹیشنوں پر ایسے لڑکے اور لڑکیاں دیکھی گئیں جنہوں نے زندگی میں پہلی بار اپنے ووٹ کا استعمال کیا تھا وہ کافی مسرور اور خوش نظر آرہے تھے ۔انہوں نے اس موقعے پر میڈیا کو بتایا کہ انہیں ووٹ ڈالتے ہوئے اس بات کا بھر پور احساس ہورہاتھا کہ وہ اب ذمہ دار شہری بن گئے ہیں اور اب وہ زندگی کے ایسے پڑاو پر پہنچ گئے ہیں جہاں ان کی بات میں وزن ہے کیونکہ انہیں ووٹ دینے کا حق دیا گیا ہے ۔شمالی کشمیر کے بہت سے پولنگ بوتھوں پر عمر رسیدہ افراد نظر آئے ان میں سے بیشتر کو ان کے پوتے پوتیاں سہارا دے کر پولنگ سٹیشنوں تک لاتے لے جاتے ہوئے دیکھے گئے ۔یہ عمر رسیدہ افراد بھی خوش نظر آرہے تھے ۔اکثر ووٹروں کا کہنا تھا کہ یہ کیسے ممکن ہے کہ وہ جمہوریت کے جشن میں شرکت نہیں کرتے ۔انہوں نے کہا کہ وہ کسی بھی صورت میں اپنے ووٹ کو ضایع نہیں کرتے ۔وادی کے دور دراز علاقوں گریز ،کرناہ ،تلیل ،ٹنگڈار وغیرہ سے جو اطلاعات موصول ہوئی ہیں ان کے مطابق ان پہاڑی اور سرحدی علاقوں میں بھی ووٹنگ کے حوالے سے لوگوں میں کافی جوش و خروش نظر آرہا تھا اور ان قصبہ جات میں بھی لوگ جوق در جوق پولنگ سٹیشنوں کا رخ کرتے ہوئے دیکھے گئے ۔ان پہاڑی اور سرحدی علاقوں میں خواتین بھی اچھی خاصی تعداد میں ووٹ ڈالنے کے لئے پولنگ سٹیشنوں کے باہر اپنی باری کا انتظار کرتے ہوئے دیکھی گئیں ۔کپوارہ ضلع کے لولاب ایریا میں بھی بھاری تعداد میں لوگ پولنگ سٹیشنوں کے باہر قطاروں میں کھڑے نظر آرہے تھے ۔الیکشن کمشن کی طرف سے ووٹنگ کے لئے خاص انتظامات کئے گئے تھے ۔جس پر ووٹروں نے اطمینان کا اظہار کیا اور کہا کہ آج پہلی بار الیکشن کمشن نے ووٹروں کے لئے عمدہ انتظامات کئے تھے ۔جموں سے موصولہ اطلاع کے مطابق وہاں بھی جن 26سیٹوں پر ووٹنگ ہوئی لوگوں نے سب کچھ چھوڑ کر پولنگ بوتھوں کا رخ کیا اور اپنے جمہوری حق کا استعمال کیا یعنی ووٹ ڈالے ۔والمیکی سماج سے وابستہ لوگ کافی خوش نظر آرہے تھے کیونکہ انہیں پہلی بار ووٹنگ کے حقوق فراہم کئے گئے تھے ۔غرض ووٹنگ کا سلسلہ ختم ہوگیا ۔اب 8اکتوبر کو کاونٹنگ ہے ۔الیکشن کمشن نے 5اکتوبر شام چھ بجے تک ایگزٹ پول کی تشہیر پر پہلے ہی پابندی عاید کردی ہے یعنی نہ تو اخبارات نہ ریڈیو نہ ٹی وی اور نہ ہی سوشل میڈیا پر 5اکتوبر شام چھ بجے تک ایگزٹ پول جاری نہیں کئے جاسکتے ہیں ۔ووٹنگ کے تیسرے مرحلے میں دن کے ایک بجے تک 44.8فی صد ووٹنگ ریکارڈ کی گئی بلکہ سہ پہر 3بجے تک . 56.1فی صد ووٹنگ ریکارڈ کی گئی ۔آخری مرحلے کی پولنگ بھی تشدد سے پاک پرامن طور پر اختتام پذیر ہوئی۔