بیلسٹک میزائل فضا میں ہی تباہ کردئے گئے

حوثی باغیوں کے امارات اور سعودی عرب پر مزید حملے، دو افراد زخمی
ابو ظہبی/ ایجنسیز/ متحدہ عرب امارات نے دعویٰ کیا ہے کہ اس نے یمن میں حوثی باغیوں کی جانب سے داغے گئے دو بیلسٹک میزائلوں کو پیر کی صبح فضا میں ہی تباہ کر دیا ہے۔ یہ میزائل حملہ ایسے وقت میں کیا گیا ہے جب گزشتہ ہفتے حوثی باغیوں کے ابوظہبی ایئر پورٹ پر حملے میں تین افراد ہلاک ہو گئے تھے۔ حوثی باغیوں کے فوجی ترجمان نے پیر کو ایک بیان میں بتایا کہ گروپ کی جانب سے ابوظہبی کی الظفرہ ایئر بیس اور دیگر حساس اہداف پر ذوالفقار بیلسٹک میزائل داغے گئے جب کہ گروپ کی جانب سے دبئی میں ڈرون حملے کیے گئے۔ البتہ متحدہ عرب امارات کی وزارتِ دفاع کا کہنا ہے کہ تباہ کیے گئے میزائلوں کا ملبہ ابو ظہبی کے مختلف علاقوں میں بکھرا ہوا ہےجب کہ اس حملے کے بعد حفاظتی اقدامات مزید سخت کیے جا رہے ہیں۔ امارات کی وزارتِ دفاع کی جانب سے ایک ویڈیو بھی جاری کی گئی ہے جس میں دکھایا گیا کہ ایک ایف-16 طیارہ یمن کے علاقے ال جوف میں ایک میزائل لانچر کو تباہ کر رہا ہے جو حوثیوں کی جانب سے مبینہ طور پر امارات پر حملے کے لیے استعمال کیا گیا تھا۔ حملہ امارات کی سرزمین پر ایک ہفتے کے دوران ہونے والا دوسرا حملہ ہے۔ اس سے قبل 17 جنوری کو حوثی باغیوں نے ابوظہبی کے آئل ڈپو کو نشانہ بنایا تھا جس میں ایک پاکستانی شہری سمیت تین افراد ہلاک ہو گئے تھے۔ حوثی باغیوں کے فوجی ترجمان نے دعویٰ کیا ہے کہ پیر کو جنوبی سعودی عرب کے حساس اہداف کو بھی نشانہ بنایا ہے۔ اس سے قبل سعودی میڈیا نے رپورٹ کیا تھا کہ سعودی عرب کی سربراہی میں قائم عسکری اتحاد نے جنوبی سعودی عرب میں ایک میزائل کو ناکارہ بنایا جس کی باقیات گرنے سے جنوبی سعودی عرب کے صنعتی علاقوں میں املاک کو نقصان پہنچا ہے۔ سعودی حکام کا کہنا ہے کہ حوثی باغیوں کی جانب سے سے داغے گئے میزائلز کے کچھ ٹکڑے دہران میں بھی گرے ہیں۔ اتوار کی شب سعودی عرب کی سرکاری میڈیا نے خبر دی تھی کہ ایک اور میزائل جنوبی سعودی عرب کے ایک علاقے میں گرنے سے دو غیر ملکی شہری زخمی ہوئے۔ یاد رہے کہ یمن کے حوثی باغیوں نے 2015 میں عالمی سطح پر تسلیم شدہ حکومت کا تختہ ا±لٹ کر بغاوت کر دی تھی جس کے بعد سعودی عرب اور اس کے اتحادی ممالک نے یمن میں فوجی کارروائی کا ا?غاز کیا تھا۔