(یوم آزادی ،ہر گھر ترنگا اور ترنگا یاترا)

79ویںیوم آزادی کی تقریبات کے سلسلے میں تیاریاں زور و شور سے جاری ہیں ۔جہاں سرکاری سطح پر ان تقریبات کو احسن طریقے پر انجام دینے کے لئے اقدامات کئے جارہے ہیں وہیں سکول طلبہ اور طالبات کو بھی اس دن کی اہمیت اور افادیت سے روشناس کرانے کے لئے بحث مباحثوں ،نمایشوں کا اہتمام کیا جارہا ہے ۔ڈویثرنل کمشنر نے لوگوں کو تقریبات میں بڑے پیمانے پر شرکت کی دعوت دی ہے اور لوگوں سے کہا کہ ان کے شناختی کارڈ ہی دعوت نامے تصور کئے جائینگے ۔انہوں نے کہا کہ تقریب کی تیاریاں بشمول سیکورٹی ،پارکنگ اور ٹرانسپورٹ کے انتظامات مکمل کئے گئے ہیں اور اب گھر گھر ترنگا مہم کے سلسلے میں تیاریاں کی جارہی ہیں ۔اس کے علاوہ ترنگا ریلیاں بھی نکالنے کے انتظامات کئے گئے ہیں۔سکول بچے اور بچیاں ان ریلیوں میں حصہ لینے کے لئے پُر عزم دکھائی دے رہی ہیں ۔سکول طلبہ بھی تیاریوں میں لگے ہیں۔وادی کے سب یعنی دس کے دس اضلاع میں یوم آزادی کی تقریبات منانے کے لئے لوگوں میں اچھا خاصا جوش و خروش دیکھنے کو مل رہا ہے ۔ان اضلاع میں حب الوطنی کے جذبے کی لہر جاری ہے ۔تعلیمی اداروں میں قوم پرستی کے جذبے کو ابھارنے کے لئے متحرک اور تخلیقی سرگرمیاں منظم طریقے پر دیکھی جارہی ہیں ۔ترنگے کی رنگا رنگ آرٹ اور کرافٹ کی نمایشوں کا انعقاد کیا جارہا ہے ۔طلبہ قومی پرچم سے متاثرہ آرٹ اور کرافٹ کے ذریعے اپنی تخلیقی صلاحیتوں کا مظاہرہ کرنے کے لئے بے چین دکھائی دے رہے ہیں۔ان نمایشوں میں طلبہ کے ثقافتی اور فنکارانہ ہز کے اظہار کی لگن صاف دکھائی دے رہی ہے ۔فن پاروں کی بھی نمایش کی جارہی ہے ۔کئی اضلاع میں ہر گھر ترنگا مہم کا پہلا مرحلہ اختتام پذیر ہوا ہے جن میں طلبہ ،نوجوان ،سرکاری اہلکار ،سیکورٹی اہلکار اور دیگر متعلقین کی پر جوش شرکت کا مشاہدہ کیا گیا ہے ۔ان اضلاع میں حب الوطنی کی سرگرمیوں کا ایک سلسلہ چلایا جارہا ہے جو 15اگست تک جاری رہے گا۔مہم کی اہم جھلکیوں میں دیواروں پر پینٹنگ ،اور سجاوٹ ،راکھی سازی اور رنگولی مقابلوں کے ساتھ ساتھ ترنگا تھیمز اور تخلیقی آرٹ اور کرافٹ شامل ہے شرکا قوم کے لئے غیر متزلزل خدمات کا اعتراف کرتے ہوے حب الوطنی کے جذبے سے سرشار ہیں۔یہ فخر کا مقام ہے کہ قوم 79واں یوم آزادی منارہا ہے اور ہم سب اس میں شامل ہورہے ہیں ۔آزادی کے ان برسوں میں قوم نے زبردست ترقی کی ہے ۔جس کا اعتراف دنیا بھر کے ممالک کررہے ہیں ۔بھارت کی اکانومی دوسرے ہم پلہ ملکوں سے کافی آگے ہے ۔ملک میں تعلیم کا گراف بہت زیادہ اوپر چڑھ گیا ہے ۔صنعت و حرفت نے ترقی کے پچھلے سارے ریکارڈ توڑ کررکھ دئے ہیں ۔تیس برسوں کی تباہی سے نکل کر جموں کشمیر چونکہ ترقی کی اور بڑھ رہا ہے یہاں یوم آزادی منانے کے لئے نہایت ہی عمدہ انتظامات کئے گئے ہیں ۔لوگوں نے اپنے اس عزم کو بار بار دہرایا ہے کہ وہ ہر صورت میں ملک و قوم کی حفاظت کرینگے اور ایسا کوئی کام نہیں کرینگے جس سے ملک و قوم کمزور ہوجاے گا۔کشمیری عوام میں حب الوطنی کا جذبہ کوٹ کوٹ کر بھرا ہوا ہے اور لوگوں کا کہنا ہے کہ وہ نہ صرف ہر گھر ترنگا مہم میں حصہ لینگے بلکہ یوم آزادی کی دیگر تقریبات میں جوش و جذبے کے ساتھ شریک ہونگے ۔ترنگا مہااتسو کے تحت کل یعنی 12اگست کو ہر گھر ترنگا اور ترنگا یاترا کے حوالے سے لیفٹننٹ گورنر منوج سنہا کی قیادت میں جو تقریبات منعقد ہونے جارہی ہیں ان میں لوگوں کی اچھی خاصی تعداد شامل ہو رہی ہے ۔