جموں کشمیر 50ہزار کروڑ سے زیادہ کی سرمایہ کاری

سرکاری طور پر کہا جارہا ہے کہ 5اگست 2019کے بعد جب سے دفعہ 370کو منسوخ کیا گیا ہے جموں کشمیر میں بیرونی سرمایہ کاری و صنعت کاری کا ایسا سلسلہ شروع ہوگیا ہے جو وقت گذرنے کے ساتھ وسیع ہوتا جاے گا اور اس سے جموں کشمیر میں معیشت کو چار چاند لگ جاینگے ۔مالی استحکام پیدا ہوگا اور بیروزگاری ختم ہوجاے گی ۔پڑھے لکھے نوجوان سرکاری نوکریوں کے پیچھے نہیں بھاگیں گے بلکہ خود اپنا روزگار کماکر دوسروں کو بھی اس میں حصہ دار بناینگے ۔خاص طور پر خواتین کو بااختیار بنانے میں حکومت انتہائی سنجیدگی سے اقدامات کررہی ہے اور آج صورتحال یہ ہے کہ خواتین انٹرپرونیور شپ کا دور شروع ہوگیا ہے ۔تعلیم سے فارغ ہونے کے بعد لڑکیاں خود روزگار سکیموں سے استفادہ کررہی ہیں اور آج ایسے بڑے بڑے کارخانے نظر آتے ہیں جو لڑکیاں چلارہی ہیں اور کامیابی سے آگے بڑھ رہی ہیں ۔ایک مقامی خبر رساں ایجنسی نے اس سلسلے میں جو اطلاعات فراہم کی ہیں ان میں بتایا گیا کہ کاروباری نقطہ نظر سے جموں کشمیر کے پاس صنعتوں کا مقابلہ کرنے اور آسانی سے دستیاب بھر پور وسایل کیساتھ ملازمتوں اور کام کے مواقع پیدا کرنے اور فراہم کرنے کی طاقت ہے ۔سرکاری طور پر جموں کشمیر میں سرمایہ کاری کے حوالے سے جو انکشافات کئے جارہے ہیں ان میں کہا گیا کہ لو لو گروپ ،اپولو ،EMAARاور جِندل ان چند گروپوں میں شامل ہیں جنہوں نے جموں کشمیر میں سرمایہ کاری کی ہوئی ہے ۔سرکاری انکشاف نے یہاں لوگوں اور خاص طور پر بیروزگار نوجوانوں کے دلوں میں یہ امید جگائی ہے کہ اب بیروزگاری کا خاتمہ ہوسکتا ہے اور بیروزگاروں کو کسی نہ کسی طرح روزگار کے وسایل دستیاب ہوسکتے ہیں انہیں پہلے کی طرح سرکاری دفاتر کے چکر نہیں کاٹنا پڑسکتے ہیں۔جہاں تک بیرونی سرمایہ کاری کا تعلق ہے مشرقی وسطیٰ کی مضبوط ریاستین جن میں متحدہ عرب امارات شامل ہیں جموں کشمیر میں نمایاں دلچسپی کے ساتھ سرمایہ کاری کررہی ہیں ۔سرکاری طور پر ہی یہ انکشاف ہوا ہے کہ جموں کشمیر کو گذشتہ برس 52,155کروڑ کی سرمایہ کاری کی پیشکش موصول ہوئی ہے ۔ضروری یونٹوں کی تعمیر کے لئے دونوں صوبوں جموں اور کشمیر میں تقریباًاٹھارہ ہزار کنال اراضی پہلے ہی مختص کی جاچکی ہے ۔تازہ سرمایہ کاری کو فروغ دینے اور صنعتی ترقی کو بلاک سطح پر لانے کے لئے جموں کشمیر انتظامیہ نے گذشتہ برس جنوری میں 28,400کروڑ روپے کے اخراجات کے ساتھ ایک نئی صنعتی ترقی کی سکیم متعارف کرائی تھی ۔یہ امر قابل ذکر ہے کہ سرمایہ کاری معاشی ترقی میں اہم کردار ادا کرتی ہے کیونکہ یہ ہر میدان میں ترقی کا باعث بنتی جارہی ہے ۔اس سے قبل بیرونی سرمایہ کاری کا یہاں تصور تک نہیں کیا جاسکتا تھا ۔لیکن اب ایسا ہوا ہے اور زیادہ سے زیادہ بزنس ہاوسز کو جموں کشمیر میں سرمایہ کاری کے لئے راغب کرنے کی کوششیں کی جارہی ہیں اور یہ کوششیں کامیابی کے ساتھ جاری ہیں۔