کھنموعہ میں نامعلوم بندوق برداروں کی فائرنگ ، سرپنچ ہلاک

سرینگر/
کھنموعہ سرینگر میں بدھ کی شام نامعلوم بندوق برداروں کے حملے میں ایک سرپنچ کی موت واقع ہوئی ہے ۔ اس سلسلے میں موصولہ اطلاعات کے مطابق سرینگر کے مضافاتی علاقہ کھنموعہ میں بدھ کی شام کو اُس وقت افراتفری کا ماحول پھیل گیا جب نامعلوم بندوق برداروں نے پی ڈی پی سے وابستہ ایک سرپنچ سمیر احمد بٹ پر گولی چلائی جس کے نتیجے میں سرپنچ شدید زخمی ہوا جس کو فوری طور پر ایس ایم ایچ ایس ہسپتال پہنچایا گیا جہاں دوران علاج ہی اس کی موت واقع ہوئی ہے ۔ اس معاملے کی تصدیق کرتے ہوئے ایس ایم ایچ ایس کے میڈیکل سپر انٹنڈنٹ نے بتایا کہ مہلوک شخص کی چھاتی میں ایک سے دو گولیاں لگنے کے نشانات تھے ۔ انہوںنے بتایا کہ ڈاکٹروںنے اس کا فوری علاج شروع کیا تھا تاہم وہ زخمیوں کی تاب نہ لاکر دم توڑ بیٹھا۔ اس واقعے کے حوالے سے پولیس اور فوجی ذرائع نے بتایا کہ نامعلوم بندوق برداروں نے کھنموعہ میں پی ڈی پی سے وابستہ سرپنچ پر گولیاں چلاکر اس کو شدید زخمی کردیا اور اس واقعے کے فوراً بعد پولیس اور فورسز نے علاقے کو گھیرے میں لیکر حملہ آوروں کی تلاش شروع کردی اور گھر گھر تلاشی مہم شروع کی تاہم آخری اطلاع ملنے تک علاقے کا محاصرہ جاری تھا ۔ یہاں یہ امر قابل ذکر ہے کہ گزشتہ دنوں امیراکدل سرینگر میں گرنیڈ حملے میں دو عام شہری ہلاک اور قریب 36دیگر زخمی ہوئے تھے ۔