اسرائیلی فورسز نے تین فلسطینیوں کو قتل کردیا

مغربی کنارے میں مقتولین کی گاڑی گولیوں سے چھلنی
یروشلم/ ایجنسیز/ اسرائیلی فورسز نے کارروائی کرتے ہوئے تین فلسطینیوں کو قتل کردیاہے۔ اسرائیل کی جانب سے انہیں ’دہشت گرد سیل‘ قرار دیا گیا ہے۔ واقعے میں مغربی کنارے پر موجود مقتولین کی گاڑی کو گولیوں سے چھلنی کردیا گیا۔ اسرائیلی وزیر دفاع بینی گینٹز نے کارروائی کو سراہتے ہوئے کہا کہ ’انہوں نے مغربی کنارے میں حالیہ فائرنگ کی وجہ سے انسداد دہشت گردی کی سرگرمیوں میں اضافے کا حکم دیا ہے‘۔ اسرائیل کی سرحدی پولیس اور اندرونی سیکیورٹی ایجنسی ‘شن بیٹ’ کی جانب سے جاری کردہ بیان میں سکیورٹی فورسز سے تصادم کے دوران جاں بحق ہونے والوں کی شناخت مسلح دہشت گردوں کے طور پر کی گئی۔ فلسطینی حکام نے اسرائیلی کارروائی کی مذمت کرتے ہوئے اسے ’مقدمے کی مناسب کارروائی کے بغیر پھانسی‘ قرار دیا ہے۔ اسرائیلی پولیس کا کہنا ہے کہ جاں بحق ہونے والے تینوں افراد اسرائیلی فوجیوں اور شہریوں پر حملے کے ذمہ دار تھے، واقعے میں کسی اسرائیلی کو کوئی نقصان نہیں پہنچا۔ فلسطینی تحریک فتح میں موجود ذرائع کا کہنا تھا کہ 2 افراد کی شناخت اَدھم مبروک اور محمد الدَخیل کے نام سے کی گئی ہے، ان کا تعلق عسکریت پسند الاقصیٰ شہدا بریگیڈز سے تھا۔