بارہمولہ میں چکن پوکس کے معاملے ، لوگوں میں خوف و ہراس

اسکول میں چکن پاکس پھیلنے کے بعد تدریسی سرگرمیاں غیر معینہ مدت تک معطل
لوگوں کو گھبرانے کی ضرورت نہیں ، حالات قابو میں ہیں
انفیکشن کو مزید پھیلنے سے روکنے کے لیے ضروری اقدامات کیے جا رہے ہیں۔ حکام
سرینگر/14ستمبر/و ی او آئی//بارہمولہ میں مبینہ طور پر چکن پوکس پھیلنے اور ایک سکول میں زیر تعلیم کئی طلبہ میں چکن پاکس کے کیس سامنے آنے کے بعد سکول کو فی الحال بند رکھنے کا فیصلہ لیا گیا ہے ۔ ادھر مقامی لوگوں میں اس معاملے میں تشویش کی لہر دوڑ گئی ہے ۔ وائس آف انڈیا کے مطابق شمالی کشمیر کے ضلع بارہ مولہ کے کنزر زون میں واقع گورنمنٹ مڈل اسکول خچھی پورہ میں چکن پاکس پھیلنے کے بعد حکام نے فوری طور پر تعلیمی سرگرمیاں معطل کر دی ہیں۔زونل ایجوکیشن آفیسر کنزر کی جانب سے جاری حکم نامے میں کہا گیا ہے کہ اسکول کے کئی طلبہ میں چکن پاکس کے کیس سامنے آنے پر یہ فیصلہ کیا گیا۔وائس آف انڈیاکے مطابق طبی ماہرین کی ایک ٹیم گزشتہ روز اسکول بھیجی گئی تھی تاکہ متاثرہ بچوں کا معائنہ کیا جا سکے اور احتیاطی اقدامات کیے جائیں۔یہ فیصلہ بلاک میڈیکل آفیسر کنزر کے مشورے سے لیا گیا ہے اور حکم نامے میں واضح کیا گیا ہے کہ طلبہ کی صحت و سلامتی کے پیشِ نظر کلاس ورک غیر معینہ مدت تک معطل رہے گا، جب تک کہ اگلی ہدایات جاری نہ ہوں۔محکمہ تعلیم اور طبی حکام کے مطابق انفیکشن کو مزید پھیلنے سے روکنے کے لیے ضروری اقدامات کیے جا رہے ہیں۔ والدین کو مشورہ دیا گیا ہے کہ وہ اپنے بچوں میں کسی بھی قسم کی علامات ظاہر ہونے پر فوری طور پر طبی ماہرین سے رجوع کریں۔دریں اثناءچکن پوکس کے معاملے نمودار ہونے کے بعد ضلع بھر میں لوگوں میں تشویش کی لہر دوڑ گئی ہے جبکہ ماہرین طب نے کہا ہے کہ پریشان ہونے کی کوئی ضرورت نہیں اور حالات قابو میں ہیں۔