38روزہ سالانہ امرناتھ یاترا 2025کیلئے سیکورٹی انتظامات کوحتمی شکل دینے کاعمل

CRPFچیف نے لیا فورس کی سیکورٹی تیاریوں کا جائزہ
 سیکورٹی ایجنسیوںانتہائی چوکسی برقرار رکھنے اور یاترا کی بلا تعطل تکمیل کو یقینی بنانے کی ہدایت
سری نگر /: 38روزہ سالانہ امرناتھ یاترا کے پیش نظرنیم فوجی دستوں کی581کمپنیاں تعینات کرنے کافیصلہ لئے جانے کے بیچ سی آر پی ایف کے ڈائریکٹر جنرل گیانندر پرتاپ سنگھ نے جموں میں ایک میٹنگ کی صدارت کی جس میں جموں و کشمیر میں امرناتھ یاترا سے قبل مرکزی پولیس فورس کی سیکورٹی تیاریوں کا جائزہ لیا گیا۔امسال سالانہ امرناتھ یاترا3جولائی سے9اگست تک جاری رہے ،جس کے دوران ہزاروں یاتری سطح سمندر سے3880میٹر بلندی پر واقعہ امرناتھ گھپامیں حاضری دیں گے۔جے کے این ایس کے مطابق ڈی جی سی آر پی ایف جی پی گیانندر پرتاپ سنگھ نے جموں سیکٹر ہیڈ کوارٹر میں سی آر پی ایف کے سینئر افسران کے ساتھ امرناتھ یاترا 2025 کے لئے سیکورٹی تیاریوں کا جائزہ لینے کے لئے ایک اہم میٹنگ کی صدارت کی،سی آر پی ایف نے ایکس پر ایک بیان میںکہاکہ میٹنگ میں یاتریوں کی بغیر کسی رکاوٹ کے نقل و حرکت کو یقینی بنانے کےلئے انتظامات کی تفصیل سے جانچ پڑتال کی گئی ہے۔بدھ کے روز، ڈی جی سی آرپی ایف نے وادی کشمیر کا دورہ کیا اور یاترا کی تیاریوں کا ایک اسٹریٹجک جائزہ لیا تاکہ اس کے ہموار انعقاد کو یقینی بنایا جا سکے۔انہوں نے اہم یاترا مقامات کا بھی دورہ کیا، بشمول بیس اور ٹرانزٹ کیمپ، زمینی انتظامات کا جائزہ لیا اور تمام عقیدت مندوں کے لیے ایک محفوظ، ہموار اور روحانی طور پر افزودہ یاترا کے عزم کا اعادہ کیا۔امرناتھ گھپاتک کا سفر2راستوں سے کیا جا سکتا ہے – روایتی 48 کلومیٹر کا راستہ جنوبی کشمیر کے ضلع اننت ناگ میں پہلگام سے ہوتا ہوا، اور وسطی کشمیر کے گاندربل ضلع میں 14 کلومیٹر چھوٹا لیکن تیز بال تل کا راستہ۔3جولائی سے9اگست تک جاری رہنے والی اس یاترا کودیکھتے ہوئے وزارت داخلہ نے جموں و کشمیر انتظامیہ اور پولیس کو علاقے میں پہلے سے تعینات CAPFکی156 کمپنیوں کو استعمال کرنے کا اختیار دیا ہے۔ ان میں 91 سی آر پی ایف، 30 ایس ایس بی، 15 سی آئی ایس ایف، 13 بی ایس ایف، اور 7 آئی ٹی بی پی یونٹس شامل ہیں، ہر ایک میں تقریباً 75 سے80 اہلکار شامل ہیں۔اس دوران مرکزی زیر داخلہ امت شاہ نے کہاہے کہ مرکزی حکومت اور جموں و کشمیر انتظامیہ سالانہ امرناتھ یاترا کے یاتریوں کو تمام ضروری سہولیات فراہم کرنے میں کوئی کسر نہیں چھوڑے گی۔امت شاہ نے ایکس پرایک پوسٹ میں کہاکہ عہدیداروں کو ہدایت دی گئی کہ وہ انتہائی چوکسی برقرار رکھیں اور مقدس یاترا کی بلا تعطل تکمیل کو یقینی بنائیں۔جمعرات کی رات انہوں نے امرناتھ یاترا کے لیے ایک اعلیٰ سطحی جائزہ میٹنگ کی صدارت کی اور یاتریوں کے لیے حفاظتی انتظامات اور تیاریوں کا جائزہ لیا۔