خسرو فاؤنڈیشن میں اہم کتب کی تقریبِ رونمائی

نئی دہلی//آج خسرو فاؤنڈیشن کے زیرِ اہتمام لکھک منچ، پراگتی میدان میں ایک اہم تقریب کا انعقاد ہوا، جس میں تین فکر انگیز کتابوں کی رونمائی کی گئی۔ ان کتابوں میں مسلم ویمن: اے مینیفیسٹو فار چینج از ڈاکٹر محمد معروف شاہ، سارا سنسار ایک پریوار از محمد علی شاہ سوآب، اور کانسیپٹ آف جسٹس ان ورلڈ ریلیجنز از پروفیسر خواجہ عبدالمتقی شامل ہیں۔تقریب کے معزز مہمانِ خصوصی نیشنل بک ٹرسٹ کے ڈائریکٹر شری یووراج ملک تھے، جبکہ جامعہ ملیہ اسلامیہ کے شعبۂ انسانی علوم کے ڈین پروفیسر اقتدار محمد خان نے بطور مہمانِ اعزاز شرکت کی۔ کلیدی خطاب دہلی یونیورسٹی کے آتما رام سناتن دھرم کالج کی ایسوسی ایٹ پروفیسر ڈاکٹر سید مبین زہرہ نے دیا۔تقریب کی نظامت خسرو فاؤنڈیشن کے کنوینر ڈاکٹر حفیظ الرحمٰن نے کی، جس میں مختلف علمی و ادبی شخصیات، طلبہ اور محققین نے شرکت کی۔ اس تقریب کا مقصد مسلم خواتین کے مسائل، مذہبی انصاف کے تصورات، اور عالمی ہم آہنگی جیسے موضوعات پر مکالمے کو فروغ دینا تھا۔اپنے خطاب میں شری یووراج ملک نے اس ادبی اقدام کو سراہتے ہوئے کہا کہ کتابیں معاشرتی گفتگو کو فروغ دینے کا اہم ذریعہ ہیں۔ ڈاکٹر مبین زہرہ نے اپنے خطاب میں کہا کہ ادیب معاشرے کے بیانیے کو تشکیل دینے میں اہم کردار ادا کرتے ہیں۔مصنفین نے اپنی کتابوں کے حوالے سے تفصیل بیان کی۔ ڈاکٹر محمد معروف شاہ نے مسلم خواتین کے حوالے سے موجودہ تصورات میں تبدیلی کی ضرورت پر زور دیا، جبکہ محمد علی شاہ سوآب نے اپنی کتاب سارا سنسار ایک پریوار میں عالمی ہم آہنگی کے پیغام پر روشنی ڈالی۔ پروفیسر خواجہ عبدالمتقی نے مختلف مذاہب میں انصاف کے تصورات پر گفتگو کی۔تقریب کا اختتام سوال و جواب کے سیشن پر ہوا، جس میں حاضرین نے مصنفین سے براہ راست گفتگو کی۔ یہ تقریب فاؤنڈیشن فار پلورلسٹک ریسرچ اینڈ ایمپاورمنٹ کے تعاون سے منعقد کی گئی جبکہ میڈیا پارٹنر کے طور پر آواز دی وائس نے اس میں شرکت کی۔