جموں/جموں وکشمیرکے لیفٹیننٹ گورنر منوج سنہا کی سربراہی میں ایک اعلیٰ سطحی میٹنگ منعقد ہوئی جس دوران مرکزی زیر انتظام علاقے کی سیکورٹی صورتحال کا جائزہ لیا گیا۔
معلوم ہوا ہے کہ اس میٹنگ میں پولیس، فوج ، سیول انتظامیہ اور سراغ رساں ایجنسیوں سے وابستہ سینئر آفیسران نے شرکت کی۔
اطلاعات کے مطابق جموں میں لیفٹیننٹ گورنر منوج سنہا کی سربراہی میں جموں وکشمیر کی مجموعی سیکورٹی صورتحال کا جائزہ لیا گیا۔
میٹنگ میں پولیس سربراہ نالین پربھات، چیف سیکریٹری اتل ڈھلو کے علاوہ دیگر سینئر عہدیداروں نے شرکت کی۔
ذرائع کے مطابق میٹنگ کے دوران پولیس سربراہ نے لیفٹیننٹ گورنر منوج سنہا کو پاور پوائنٹ پرزینٹیشن کے ذریعے جموں وکشمیر کی سیکورٹی صورتحال کے بارے میں جانکاری فراہم کی۔
پولیس چیف نے ایل جی منوج سنہا سے مخاطب ہوتے ہوئے کہا کہ حالیہ ملی ٹینٹ حملوں کے بعد مرکزی زیر انتظام علاقے کی سیکورٹی صورتحال کا از سر نو جائزہ لیا گیا ہے۔
انہوں نے کہاکہ سرگرم ملی ٹینٹوں اور ان کے معاونین کے خلاف بڑ ے پیمانے پر آپریشن شروع کیا گیا جس کے مثبت نتائج سامنے آرہے ہیں۔
انہوں نے مزید بتایا کہ جموں وکشمیر کے سبھی اضلاع میں سیکورٹی فورسز کو ہائی الرٹ پر رکھا گیا ہے۔
ذرائع کے مطابق میٹنگ کے دوران شمالی کمان کے سربراہ نے ایل جی منو ج سنہا کو لائن آف کنٹرول کی صورتحال کے بارے میں جانکاری فراہم کی۔
انہوں نے کہاکہ ایل او سی پر فوج پوری طرح سے چوکس ہے اور کسی کو بھی اس طرف آنے کی اجازت نہیں دی جائے گی۔
انہوں نے مزید بتایا کہ سیکورٹی فورسز کے اہلکار ایل او سی کے نزدیک جنگلی علاقوں پر بھی نظر گزر بنائے رکھے ہوئے ہیں۔
ذرائع نے بتایا کہ میٹنگ کے دوران لیفٹیننٹ گورنر منوج سنہا نے پولیس اور فوج کے آفیسران کو ہدایت دی کہ سرگرم ملی ٹینٹوں اور حالیہ حملوں میں ملوث دہشت گردوں کو جلدازجلد انجا م تک پہنچایا جائے۔
انہوں نے کہاکہ جموں وکشمیر میں کسی کو بھی پر امن حالات کو درہم برہم کرنے کی اجازت نہیں دی جائے گی جبکہ سماج دشمن اور ملک دشمن عناصر کے خلاف مزید سخت اقدامات اٹھانا اب ناگزیر بن گیا ہے۔
