شیر کالونی سوپور میں پُر اسرار دھماکہ ، قصبہ میں سنسنی

چار افراد لقمہ اجل ، علاقے میں کہرام مچ گیا ، پولیس نے معاملے کی چھان بین شروع کی
سرینگر//شمالی کشمیر کے قصبہ سوپور میں پُر اسرار دھماکہ کے نتیجے میں چار افراد لقمہ اجل بن گئے ہیں جبکہ اس دھماکہ کے نتیجے میں پورے قصبہ میں سنسنی اور خوف و دہشت کا ماحول پھیل گیا ہے ۔ ادھر ایس ایس پی سوپور نے کہا ہے کہ کنبہ ردی کا کاروبار کررہا تھا اور اسی ردی کے مال سے کچھ شئے برآمد ہوئی جس زور دار دھماکہ سے پھٹ گئی اور یہ ہلاکتیں ہوئیں۔ دریں اثناءپولیس نے دھماکہ کے معاملے میں تفتیش شروع کی ہے ۔ وائس آف انڈیا کے مطابق شمالی کشمیر کے سوپور میں پیر کی دوپہر ایک پراسرار دھماکے میں چار لوگوں کی موت ہو گئی۔ذرائع نے بتایا کہ شیر کالونی، سوپور میں ایک پراسرار دھماکہ ہوا، جس میں چار افراد شدید زخمی ہوئے اور انہیں بعد میں قریبی اسپتال لے جایا گیا، جہاں ڈاکٹروں نے ان میں سے تین کو مردہ قرار دیا۔ایک اور شدید زخمی شخص کو سکمز صورا ریفر کیا گیا تاہم وہ ہسپتال لے جاتے ہوئے راستے میں ہی دم توڑ گیا۔ادھر پولیس ایس ایس پی محترمہ دیویا نے اس معاملے پر میڈیا نمائندوں سے بات کرتے ہوئے کہا کہ پولیس اس معاملے کی چھان بین کررہی ہے ۔ انہوںنے کہاکہ دراصل یہ کنبہ ردی کا کاروبار کررہا ہے اور جس گاڑی سے ردی کا مال آیا تھا اسی ردی میں کوئی شئے آئی تھی جو زور دار دھماکہ کے ساتھ پھٹ گئی ۔اس طرح سے اس واقعے میں چار افراد کی موت واقع ہوئی ہے ۔ مہلوکین کی شناخت نذیر احمد نادرو، اعظم اشرف میر، عادل رشید بٹ ساکن شیر کالونی سوپور کے بطور ہوئی ہے ۔ اس واقعے کی وجہ سے علاقہ میں صف ماتم بچھ گئی اور لوگوں کی بڑی تعداد جائے وقوعہ پر جمع ہوئی ۔ ادھر اس پُر اسرار دھماکہ کی وجہ سے پورے قصبہ میں سنسنی پھیل گئی ہے ۔